Қазақистан уйғурлири корона вируси юқуми мәзгилидә хәйр-сахавәт ишлирини давам қилмақта

Ихтиярий мухбиримиз ойған
2020.07.23
Share on WhatsApp
Share on WhatsApp
Chonja-yezisidiki-kheyr-sakhavet-ishliridin-korunush-.jpg Чонҗа йезисидики хәйр-сахавәт ишлиридин көрүнүш 2020-йил июл, алмута.
RFA/Oyghan

Қазақистанда мушу йилниң 16-март күни корона вируси кесилиниң тарқилиши мунасивити билән пәвқуладдә һаләтниң, андин көп вақит өтмәйла карантин тәртипиниң елан қилинғанлиқи мәлум. Шу мунасивәт билән аһалиләрниң өйлиридә олтуруш, кочиларда маска тақаш, тазилиқни сақлаш, адәм көп йәргә топланмаслиқ, чоң паалийәтләрни өткүзмәслик қатарлиқ бихәтәрлик чарилири көрүлди. Шундақтиму әлниң көплигән шәһәр вә йезилирида корона вирусидин зәрдаб чекиватқанларға маддий ярдәм көрситиш, озуқ-түлүк, дора-дәрмәк вә башқиму турмушта лазим болған нәрсиләр билән тәминләш охшаш хәйр-сахавәтлик ишлири елип берилишқа башлиған иди. Шундин буян мана төт айдин көп вақит өткән болсиму, мундақ ишлар һелиму давам қилмақта.

Йеқинда әнә шундақ хәйр-сахавәтлик паалийәтлири уйғурлар зич олтурақлашқан алмута вилайитиниң әмгәкчиқазақ вә уйғур наһийәлиридиму елип берилди.

Шуларниң бири әмгәкчиқазақ наһийәсиниң челәк йезисида атиси туюқсиз бала-қазадин орун тутуп, йетип қалған алтә балилиқ аилигә мәмликәтниң һәр қайси җайлирида яшаватқан уйғур юрт-җамаәтчилики тәрипидин чоң маддий ярдәм көрситилгәнлики тоғрилиқ хәвәрләр иҗтимаий таратқулардики асасий темиларниң биригә айланған иди. Биз шу мунасивәт билән алмута вилайитиниң әмгәкчиқазақ наһийәсигә қарашлиқ челәк районлуқ уйғур мәдәнийәт мәркизи рәисиниң орунбасари нурҗамал һасановаға мураҗиәт қилдуқ.

Нурҗамал һасанова радийомиз зияритини қобул қилип, мундақ деди: “икки-үч күн мабәйнидә қазақистан диярида яшаватқан барлиқ көйүмчан қериндашлиримиз челәк тәвәсидә яшаватқан шерипҗан исимлик көп балилиқ аилигә өзлириниң ярдимини көрситип кәлди. ‛тама-тама көл болар‚ дәп, бу хәлқимизниң дана сөзиниң испати. Шу аилигә һазирқи заманға лайиқ өй елип олтуримиз.”

Зияритимизни қобул қилған юрт актиплириниң бири модәнгүл җумайева мундақ деди: “апәткә учриған бир балимиз бар иди. Бала-чақамни бақимән дәп, дәрәхтин йиқилип чүшүп, йигирмә күн мабәйнидә ағриқханида йетип чиқти. Иҗаригә туридиған өйидин уларни чиқиривәтти. Бир тонушлири уларға кәпә тикип берипту. Әтиси мән бардим. Дуня йүзидики юртимиз мунчилик ярдәм қилиду дәп ойлимиғандуқ. Бир өйгә пул йиғилип, йәнә йегүдәк пуллири чүшти. Мана чонҗидин балилар 106 миң ярдәм пули билән кийим-кечәк елип кәпту. У йәрдиму адәмләр яман кесәлдин қирилип кетиватиду, дегән сөзләрни аңлиғанидим. Шуниң үчүн мән әнә шу балиниң разилиқи билән шу йәрдә бир балини болсиму сақлап қелиңлар дәп, биз у пулларни алмидуқ.”

Модәнгүл җумайева буниңдин ташқири йәнә бәзиләрниң мәзкур аилини бир қатар мал-варан биләнму тәминлигәнликини ейтип, ярдәм қолини созғанларниң барлиқиға чоң миннәтдарлиқини билдүрди.

Биз уйғур наһийәсиниң чонҗа йезисида елип берилған хәйр-сахавәт һәрикитини билиш үчүн шу йеза турғуни гүлбәһрәм тейипова билән алақиләштуқ. У зияритимизни қобул қилип, мундақ деди: “июн ейидин тартип бизниң йезидиму қайтидин карантин елан қилинди. юртимизда вирусниң күчләнгәнлики тоғрилиқ шум хәвәрләр келишкә башлиди. Ағриқлар көп болғанлиқтин наһийә ағриқханисида керәклик аппаратларниң йетишмәйдиғанлиқини билгән камаз машинилирини йүргүзгүчи мәрданә йигитлиримизниң бир кечидә алмута шәһиридин қиммәт баһалиқ үч аппаратни йәткәзүп кәлгәнликини аңлидуқ. Хәлқимизниң ‛қаттиқ нанни тәң бөлүшәйли‚ дегән дана сөзидәк чонҗ хәлқи бирдинла ойғанди. Йәнә төрт аппарат, орун-көрпә, кариватлири билән тәминләнди.”

Гүлбәһрәм тейипованиң ейтишичә, чонҗа йезисиниң кафе-ресторанлири һәмшириләрни тамақ билән тәминләш, яшлар болса шу тамақларни җай-җайларға йәткүзүш ишлирида чоң актиплиқ көрсәткән икән. юрт-җамаәтчиликниң бирлики арқисида чонҗа ағриқханиси барлиқи болуп 14 кислород аппарати вә шундақла киралғу биләнму тәминләнгән. Бу җәһәттә салмақлиқ маддий ярдәм көрсәткәнләр өз исимлирини аташтин баш тартқаникән.

Игилишимизчә, қазақистан уйғурлири уйғур мәдәнийитини қоллаш, һәр хил милләтләрдин болған йитим-йесирларға, мәҗруһ балиларға, көп балилиқ аилиләргә маддий ярдәм көрситиш ишлирини давамлиқ йүргүзүп кәлмәктикән. Буниңдин ташқири, уйғур җамаити, тәшкилатлири тәбиий апәт йүз бәргән җайларғиму өзлириниң ярдәм қолини созуп келиватқан икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.