Qazaqistanda xitaygha qarshi keypiyatning künséri küchiyiwatqanliqi melum

“Xelq'araliq siyaset oqushluqi” namliq xewerler torida élan qilin'ghan bir parche mulahizige qarighanda, bu yil martta qazaqistanda xitaygha qarshi keypiyat téximu kücheygen. 27-Mart, almuta we qazaqistanning bashqa asasliq sheherliride xitayning tesiri we qazaqistan'gha kéngiyishini nishan qilghan namayishlar ötküzülgen. Almutadiki namayishqa bir qanche yüz kishi qatnashqan, 20 namayishchi qolgha élin'ghan.

Namayishqa qazaqistanda yéqinda maqullan'ghan yer ishlitishke munasiwetlik bir yéngi qanun seweb bolghan.

Melum bolushiche, qazaqistan qanuni chet'el orunliri we puqralirining qazaqistandin yer sétiwélishni cheklisimu, emma chet'el orunlirining déhqanchiliq yérini ijare élishigha yol qoyidiken.

Ijarige bérilgen her qandaq yerni axirida sétiwalghili bolidighan bolup, bu namayishchilarni endishige salghan muhim nuqtilarning biri iken. Beziler hetta buni xitayning qazaqistan'gha “Kéngiyish” pilanining bir qismi, dep qarighan.

Qazaqistanda 2016-yilidin buyan yer mesilisige bolghan endishe tüpeyli xitaygha qarshi namayishlar élip bérilghan. Eyni waqitta, qazaqistan déhqanchiliq yerlirining sétilishini waqtinche tonglatqan, bu dölet ichide jiddiylik we endishe peyda qilghan.

2009-Yili sabiq qazaq prézidénti nursultan nezerbayéü xitay da'irilirining purchaq we qicha térish üchün qazaqistandin bir milyon géktar yer ijarige bérishni telep qilghanliqini ashkarilighan. Mezkur xewer otturigha chiqqandin kéyin nechche onlighan qazaqistan pa'aliyetchisi xitayning almutadiki bash elchixanisi aldida qazaqistan zéminining xitaygha ijarige bérilishige qarshi namayish ötküzgen.

Bu yil féwral qazaqistan prézidénti buyruq chiqirip, chet'el organliri we puqralirining qazaqistandiki déhqanchiliq yerlirini sétiwélishi we ijarige bérishini chekligen idi.