Уйғур қизи дилназ тилайева “қазақистан йәр мәликиси” аталди

Ихтиярий мухбиримиз ойған
2022.11.22
Share on WhatsApp
Share on WhatsApp
Dilnaz-tilayeva-1.jpg Уйғур қизи дилназ тилайева қазақистанниң “йәр мәликиси” мукапатиға еришти. 2022-Йили ноябир, қазақистан.
RFA/Oyghan

Йеқиндин буян қазақистанниң рус вә қазақ тиллиқ мәтбуат сәһипилиридә һәм иҗтимаий торларда уйғур қизи дилназ тилайеваниң “қазақистан мәликиси” мусабиқисигә қатнишип, “қазақистан йәр мәликиси” мукапатиға еришкәнлики тоғрилиқ хәвәрләр елан қилинди. Бу, болупму иҗтимаий торларда күчлүк инкас пәйда қилғаниди.

Қазақистанниң “қазақ ахбарат бюроси” қатарлиқ инавәтлик аммиви ахбарат васитилириниң хәвәрлиридин мәлум болушичә, алмута шәһиридики җумһурийәт сарийида өткән бу мусабиқигә қазақистанниң һәр қайси вилайәт вә наһийәлиридин яш қизлар қатнашқан. Қазилар топи нурғунлиған қизларниң ичидин пәқәт 23 нәпирини таллиған. Шуларниң ичидин йәнә 12 қизни талливелип, мусабиқигә қатнаштурған. Мусабиқә шәртлири бойичә униң қатнашқучилири һәр хил кийимләрдә вә жанирларда өз һүнәрлирини намайиш қилған.

Қазақистанниң “йәр мәликиси” мукапатиға еришкән уйғур қизи дилназ тилайева(сиңлиси билән олтурған) ата-аниси вә қериндашлири билән хатирә сүрәттә. 2022-Йили ноябир, қазақистан.
Қазақистанниң “йәр мәликиси” мукапатиға еришкән уйғур қизи дилназ тилайева(сиңлиси билән олтурған) ата-аниси вә қериндашлири билән хатирә сүрәттә. 2022-Йили ноябир, қазақистан.
RFA/Oyghan

Нәтиҗидә тонулған вә талантлиқ артислар, телевизийә риясәтчилири, нахшичилар, тор апторлири вә башқиларниң қобул қилған қарарлириға бинаән мусабиқидин бәш қиз озуп чиққан. Уларниң һәр бири мәхсус мукапат намлири билән мукапатланған. Әнә шулар қатаридин уйғур қизи дилназ тилайева қазақистанниң “йәр мәликиси” мукапатиға еришип, хәлқара мусабиқигә йолланма алған.

Мәзкур мусабиқигә қатнашқан бу бәш қиз ичидин томирис какимова “қазақистан-2022-йил мәликиси” ғалиби аталған. Буниңдин ташқири, “дуня мәликиси” мукапатиға диана ташимбайева, “йәр мәликиси” мукапатиға уйғур қизи дилназ тилайева еришкән.

Мусабиқә қаидилири бойичә униңға 17-25 яшлар арилиқидики, бойи 165 тин 185 сантиметирғичә келидиған қизлар қатнашқан. Қазилар уларниң сиртқи көрүнүшлиридин ташқири йәнә натиқлиқ қабилийитини, һәр хил саһәләрдики билимини вә саватини, шу җүмлидин болупму қазақ вә инглиз тиллири бойичә билимини баһалиған.

Биз “йәр мәликиси” мукапатиға еришкән дилназ тилайеваниң зиярәт қилдуқ. У мундақ деди: “әслидә униңға қатнишидиған оюм болмиғаниди. Инстаграмға кирип, туюқсизла ‛қазақистан мәликиси‚ мусабиқиси болиду дегән хәвәрни учритип қалдим. Қарисам, у йәрдә мән оқуватқан ‛туран‚ университетиниң һәқсиз оқуш шәртиму баркән. Шуниң билән униңға қатнишишни қарар қилдим. Бирақ бу һәқтә ата-анамға ейтмидим. Әгәр қобул қилса, шу вақитта дәймән дәп ойлидим. Шундақ қилип илтимас сунғанидим, көп вақит өтмәйла тор арқилиқ биринчи басқучтин өткиним тоғрилиқ маңа хәвәр кәлди вә мени тәклип қилди. Мән буниңға қаттиқ хушал болуп, дәрру апамға телефон қилдим. Апамму буниңға хушал болди. Омумән ата-анам мени һәр тәрәптин қоллиди”.

Дилназ тилайева 2003-йили алмута вилайитиниң әмгәкчиқазақ наһийәсигә орунлашқан қаратуруқ йезисида дуняға кәлгән. У талғир наһийәсиниң гүлдала оттура мәктипини тамамлап, алмута шәһиридики “туран” университетиниң тәрҗимә факултетиға оқушқа киргән. Һазир шу алий мәктәпниң 2-курсида билим еливатиду. Дилназ кичикидинла китаб оқуш, уссул, бош вақитлирида тәнһәрикәтниң һар хил түрлири бойичә шуғуллинип кәлмәктә. У шуниңдәк үч йерим йил мабәйнидә йеңи кийимләрниң моделини көрситиш саһәсидә хизмәт қилмақта.

Уйғур қизи дилназ тилайева қазақистанниң “йәр мәликиси” мукапатиға еришти. 2022-Йили ноябир, қазақистан.

Дилназ тилайева өзиниң “мәликә” мусабиқисидин алған тәсиратини мундақ дәп чүшәндүрди: “мениң исмимни техи атимай туруп, бойнумға лента асқанда мән һәтта өзүмни туталмай, хушаллиқимдин йиғливәттим. Мән наһайити қаттиқ хушал болдум. Пәрдиниң у йеқида маңа қарап турған қизларму йиғлашқа башлиди. Бу мениң үчүн күтүлмигән бир вәқә болди. Әмди техиму тиришип, елимни, хәлқимни дуняға тонутимән дегән арминим бар. Алдимда турған хәлқара мусабиқидә йәнә утуққа йетимән дегән үмидимму бар. Мән мени қоллиған барлиқ достлиримға, мениң үчүн аваз бәргән барлиқиңларға чоң рәһмитимни ейтимән. Силәрниң авазиңлар маңа күч-мәдәт бәрди. Шундақла даим мениң йенимда болған ата-анамға, йеқинлиримға чәксиз миннәтдармән. Һәммиңларға йәнә бир қетим чоң рәһмәт!”.

Һазир алмута вилайитиниң талғир наһийәсигә қарашлиқ гүлдала йезисида яшаватқан дилназниң аниси адиләм тилайева ханим мундақ деди: “бизниң аилидә икки қиз, икки оғул бар. Дилназ балилиримниң чоңи. Дилназниң бала чеғидин армини кино артиси болуш иди. Кичикидин бойи егиз, келишкән, чирайлиқ, гүзәл қизлардин болуп өсти. Достлири, синипдашлири, муәллимлири қарап, қизиқатти. ‛алмута мәликиси‚ мусабиқисигә қатнишип, биринчи ‛витсе ( муавин) мәликә‚атиқиға игә болди. 18-Ноябирда дилназ ‛қазақистан йәр гүзили‚ атиқиға игә болди. Әмди аләм бойичә дәриҗигә тәйярлиқ қилимиз. Биз қизимизни мәниви тәрәптин қоллап-қуввәтлидуқ. Бирақ дилназ өз күчи билән мушу нәтиҗиләргә йәтти. Мениң қизимни қоллап-қуввәтлигән, ярдәм бәргән, аваз бәргән хәлқимгә миннәтдарлиқ билдүргүм келиду”.

Қазақистандики уйғур яшлири һәр хил саһәләрдә өзлириниң талантини намайиш қилип кәлмәктә. Уларниң ичидә болупму тән-һәрикәт саһәсидә пәқәт җумһурийәт даирисидила әмәс, бәлки дуня дәриҗисидиму тонулған тәнһәрикәтчиләр бар. Уйғур яшлири буниңдин ташқири илим-пән, сәнәт, әдәбият, ишләпчиқириш, йеза игилики вә башқиму саһәләрдә көзгә көрүнүп, уйғурларни дуняға тонутмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.