Қәдрийә ғопурниң тоқсудики аниси һаҗирә розиниң тутқунда икәнлики дәлилләнди

Мухбиримиз шөһрәт һошур
2020-03-12
Share
qedriye-ghopur-anisi-Hajıre-Rozi.jpg Гуваһлиқ баянатлири түркләр арисида қизиқиш қозғиған қәдрийә ғопурниң аниси һаҗирә рози ханим.
Qedriye Ghopur Teminligen

Аниси һәққидики бир йүрүш гуваһлиқ баянатлири билән түркләр арисида күчлүк диққәт қозғиған норвегийәдики қәдрийә ғопур өзиниң гуваһлиқ баянатлирида анисиниң 10 йиллиқ кесилип кәткәнлики вә нөвәттә тоқсу түрмисидә икәнликини баян қилған иди. Мухбиримизниң тоқсудики алақидар орунларға қарита елип барған телефон зиярәтлири давамида һаҗирә розиниң тутқунда икәнлики хизмәт орни тәрипидин дәлилләнди. Қәдирийә өзиниң тәсират баянатида гуваһлиқ баянатлириниң анисини қутулдуруш үчүн қилидиған ишлириниң башланғучи икәнликини әскәртти

Норвегийәдики қәдирийә ғопурниң гуваһлиқ баянатида униң анисиниң тоқсу мәдәнийәт идарисиниң боғалтири икәнлики вә 10 йиллиқ кесиветилгәнлики тилға елинған иди. Тоқсу наһийәлик сот мәһкимиси хадимлири дәсләптә бу һәқтики соалимизни җавабсиз қалдурди. Арқидин өзлириниң барлиқ мәһкумларниң кимликини әстә туталмайдиғанлиқини билдүрүп, бу һәқтә мәлумати йоқлуқини ейтти. Қәдирийә ғопур аниси һәққидики учурни ишәнчлик мәнбәләрдин алғанлиқини, әмма мәнбәниң кимликини ашкарилашқа болмайдиғанлиқини ейтқан иди.

Тоқсу наһийәлик мәдәнийәт идарисиниң бир хадими һаҗирә розиниң қанчә йил кесилгәнлики һәққидики соалимизға җаваб бериштә иккиләнди. У арқидин бу соалимизға мунасивәтлик хадимлардин мәлумат елип җаваб беридиғанлиқини ейтти. Әмма һаҗирә розиниң кесилгәнлик учурини инкар қилмиди.

Қәдирийә ғопурниң бир гуваһлиқ баянатида дейилишичә, у анисиниң бихәтәрликини көздә тутуп, түркийәдә оқуған вә яшиған 6 йил давамида хитайға қарши һечқандақ бир сөз һәрикәтләрдә болмиған. У баянатида өзиниң өтмүштики бу еһтиятчанлиқиға пушайман қилғанлиқи вә бу пушаймандин чоң бир дәрс алғанлиқини билдүргән.

Биз сөһбитимиз давамида униң түркийәдики 6 йиллиқ һаяти давамида ана вәтинидә юртдашлири көрүватқан зулумни ашкарилимиғанлиқи үчүн идийә вә һессият җәһәттин бир тоқунуш ичидә болған яки болмиғанлиқини соридуқ. У өзиниң бундақ бир тоқунушта болғанда аниси өгәткән һиммәтләргә асасән көңлигә тәсәлли тапқанлиқи вә кейинки йилларда өз кәспи арқилиқ миллитигә хизмәт қилишни көңлигә пүккәнлики, әмдиликтә болса өзидә йәнә башқа алаһидиликләрниму байқиғанлиқи һәмдә буниңдин кейинки һаят йолида кәспий саһәдила чәклинип қалмайдиғанлиқини илгири сүрди.

Ахирида телефонимизни қобул қилған тоқсу мәдәнийәт идарисиниң йәнә бир хадими һаҗирә ғопурниң қолға елинип болғанлиқини ашкарилаш арқилиқ униң тутқунда икәнлики һәққидики учурниң тоғрилиқини дәлиллиди.

Қәдирийә ғопур сөһбитимизниң ахирида өзиниң гуваһлиқ баянатлири қизиқиш қозғиған болсиму, техи көзлигән мәқситигә йәтмигәнлики, бу баянатларниң у ниң анисини қутулдуруш үчүн қилидиған ишлириниң башланғучи икәнликини әскәртти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.