Qelbinur: "Widéyodiki polu étiwatqan qollar méning japakesh anamning ishchan qolliri idi"

Muxbirimiz gülchéhre
2019-06-13
Élxet
Pikir
Share
Print
Amérikining wiskansén shitatida yashawatqan qelbinurning ikki yérim yildin buyan alaqisi pütünley üzülgen anisi hawaxan.
Amérikining wiskansén shitatida yashawatqan qelbinurning ikki yérim yildin buyan alaqisi pütünley üzülgen anisi hawaxan.
RFA/Gülchéhre

Wetini bilen bolghan alaqisi pütünley üzüwétilgen chet'ellerdiki Uyghurlar üchün tor dunyasida tarqalghan yaki ijtima'iy taratqularda uchrap qalidighan öz yurti we mehellisige a'it uchurlar intayin qimmetliktur.

Radiyomiz ilgiri Uyghur diyaridiki daril'étamlarda turuwatqan Uyghur balilirining hayatidin élin'ghan qisqa sin körünüshliridin öz perzentlirini tonup qalghan Uyghurlarning azabliq hékayilirini anglatqan idi.

Uyghur élige barghan xitay sayahetchiler we yaki bashqilar tarqatqan sin körünüshliri we qisqa widéyolardimu bir qisim Uyghur balilirining échinishliq ehwali körsitilgen bolup, chet'ellerdiki bezi Uyghur a'ililirining bu filimlardin yurtida qalghan balilirini tonuwélishtek misallar köpeymekte.

Gerche xitay da'iriliri Uyghurlarning chet'el bilen bolghan alaqisini qattiq kontrol qiliwatqan bolsimu, emma hazirqi taratqularning tereqqiyatidiki tézlik tüpeyli xitayning yuqiri téxnikiliq teqib sistémisida yenila bezi yochuqlarning barliqi bilinmekte.

Bügünki hékayimizning qehrimani amérikaning wiskansén shitatida yashawatqan qelbinur xanimdur.

U radiyomiz ziyaritini qobul qilip, özining ikki yérim yildin buyan alaqisi pütünley üzülgen anisi hawaxanni yéqinda féysbukqa chaplan'ghan, esli menbesi xitayning "Doyin" toridin tarqalghan bir sin körünüshidin tonup qalghanliqini bildürdi. Qelbinur bir tereptin bu sin körünüshidin anisining salamet turghanliqini körüp xosh bolghan bolsa, yene bir tereptin anisining japa chékiwatqanliqini körüp azablan'ghanliqini bayan qildi.

Qelbinur özining féysbuk bétige mundaq dep yazghan: "Apam! . . . Qaysinglar féysbuk arilawétip, yillap awazini anglash we chirayini körüshke qadir bolalmighan ata-ananglarni uchritip qaldinglar? manga uchridi, mana widéyodiki polu örüwatqan ayal méning apam, japakesh apam, mihnetkesh apam, yalghuz apam! bu widéyoni tarqatqan qérindishimiz 'erlerning hemmisi lagérda, tijaret qilghanlarning hemmisi ayallar iken' dégen téma astida tarqitiptiken. Emma méning apam qandaqtur bir sodiger emes, a'ile ayali, yeni déhqan ayal, hünerwen-mashinchi ayal. Üch perzentini we kichik inilirini oqutqanliqi, ularni chet'ellerde oqutqanliqi we ularning kélechikini qurghini üchün lagérgha solan'ghan, lagérdin chiqqandin kéyin xarabiyliqqa aylan'ghan hoylisida polu étiwatqan apam! . . ."

Qelbinur apisi bar bu widéyoni 8-iyun körüp, özining féysbuk bétide hembehirligen. Bu widéyoning doyin torigha yollan'ghan waqti 2019-yili 4-ayning 15-küni iken.

Qéni emise, qelbinur xanimning hékayisini yuqiriqi awaz ulinishidin anglighaysiler.

Toluq bet