Қәшқәр керәмбағ дохтурханисидин көп санда ишчи-хизмәтчиниң лагерда икәнлики илгири сүрүлмәктә

Мухбиримиз шөһрәт һошур
2019-09-11
Елхәт
Пикир
Share
Принт
Сим тикән билән чөридәлгән лагер дәрвазисидики хитай дөләт байриқи. 2019-Йили 4-июн, йеңисар.
Сим тикән билән чөридәлгән лагер дәрвазисидики хитай дөләт байриқи. 2019-Йили 4-июн, йеңисар.
AFP

Қәшқәр вәзийитидин хәвәрдар кишиләрдин бири қәшқәр вилайәтлик 1‏-дохтурхана ишчи-хизмәтчилиридин абдуқеюм тәвәккүл вә әнвәр абдукерим қатарлиқ 30 дин артуқ дохтур вә хадимниң бир йилдин артуқ вақиттин буян лагерда икәнликини мәлум қилғаниди. Мухбиримизниң елип барған ениқлашлири давамида, дохтурханиниң алақидар бихәтәрлик хадимлири дохтур әнвәр абдукеримниң лагерда икәнликини дәлилләш билән бирликтә, бу дохтурханидин көп санда кишиниң лагерда икәнликини тәкитлиди.

Радийомизға кәлгән инкаста, хитайниң аталмиш кәспий тәрбийәләш мәркәзлири намидики орунлириниң типик бир җаза лагери икәнлики тәкитлинип; бу мәркәзләрдә өз кәспидә даң чиқарған һәр саһә кишилириниң мәвҗутлуқи баян қилинған вә пакит сүпитидә қәшқәр вилайәтлик 1-дохтурхана, йәни керәмбағ дохтурханисиниң өзидинла 30 дин артуқ дохтур хадимниң лагерға соланғанлиқи қәйт қилинған. Биз бу учурниң тоғра-хаталиқини айдиңлаштуруш үчүн, дохтурханиға телефон берип, аввал исми аталған әнвәр абдукерим қатарлиқ икки нәпәр хадимниң нөвәттә дохтурханида бар-йоқлуқини соридуқ. Дәсләптә хадимлар уларниң нөвәттә иш-орнида йоқ икәнликини ашкарилиған болсиму, әмма биз уларниң қайси лагерда икәнликини сориғинимиздин кейин; җавабини өзгәртти яки җаваб бериштин өзини тартти.

Мәлум болушичә адәттә керәмбағ дохтурханиси дәпму атилидиған бу дохтурхана, қәшқәрдики әң қәдимий дохтурхана болуп 1934-йили қурулған. Мәзкур дохтурхана тор бетидә тонуштурулушичә, адәттә давалаш, җиддий қутқузуш, алдини елиш, тәрбийәләш вә тәтқиқат қатарлиқ универсал мулазимәт елип берилидиған бу дохтурханиниң 3448 нәпәр ишчи-хизмәтчиси бардур. Мәзкур дохтурханиниң йәнә бир хадимиму дәсләптә әнвәр абдукеримниң нөвәттә иш орнида йоқлуқини тилға алған болсиму, арқидин бу дохтурханида 3миңдин артуқ ишчи-хизмәтчи барлиқини сәвәб қилип көрситип, әнвәр абдукеримни тонумайдиғанлиқини ейтти.

Дохтурхана тор бетидә дейилишичә, бу дохтурхана универсал давалаш иқтидари җәһәттә уйғур райони бойичә 3-, қәшқәр бойичә 1-орунда туриду. Униңда 11 профессор, 116 магистирлиқ вә униңдин юқири оқуш тарихиға игә хадим; 246 нәпәр алий унванлиқ дохтур мәвҗуттур. Радийомизға кәлгән инкаста, мана мушундақ даңлиқ бир дохтурханида ишләшкә талланған вә бу дохтурханида көзгә көрүнәрлик хизмәт көрситиватқан 30 дин артуқ уйғур дохтурниң аталмиш тәрбийәләшкә әкетилгәнлики мәсхирилик бир тилда оттуриға қоюлған.

Телефонимизни қобул қилған йәнә бир хадим; бу дохтурханида өзи ишләватқан бөлүмдин кимниң лагерда икәнликини сориғинимизда, әнвәр исимлик бири икәнликини ашкарилиди. Әмма у әнвәрниң немә сәвәбтин лагерға әкетилгәнлики, қандақ бир тәрбийәгә моһтаҗ көрүлгәнликини сориғинимизда, өзиниң бу һәқтә мәлумати йоқлуқини ейтти. Дохтурхана тор бетидә тонуштурулушичә, 2000 дин артуқ кесәл каривити болған бу дохтурхана, қәшқәр, ақсу, қизилсу вә хотән тәвәсидики 6 милйондин артуқ киши үчүн мулазимәт қилиду.

Радийомизға кәлгән инкаста дейилишичә, тәрбийәләшкә әкетилгән 30 дин артуқ уйғур дохтурниң көпинчиси билип яки билмәй сиясий мәһбус аилә-тавабиатлирини давалап қалғанлиқи вә яки уларға һесдашлиқ билдүрүп қалғанлиқи үчүн тутулған; йәнә бәзилири болса, диний кәйпияти гәвдилик болғанлиқи вә яки миллий мәсилиләргә бәзи сорунларда һөкүмәтниң күткинидин пәрқлиқ позитсийә билдүрүп салғанлиқи үчүн тутулған. Мәзкур дохтурханидин телефонимизни қобул қилған бир хадим тутқундики уйғур дохтурларниң әһвалидин хәвәрсизликини тәкитлигән болса, дохтурхана қоғдаш бөлүми хадими, өзиниң бу һәқтә мәлумат берәлмәйдиғанлиқиниң сәвәбини изаһлаш җәрянида, бу дохтурханида «тәрбийәләшкә әкетилгәнләрниң көп» икәнликини дәлиллиди.

Пикирләр (0)
Share
Толуқ бәт