Qirghizistan Uyghurliri dunya Uyghur qurultiyining rehberliri bilen tor arqiliq yighin ötküzdi

Ixtiyariy muxbirimiz féruze
2021-03-01
Share
Qirghizistan Uyghurliri dunya Uyghur qurultiyining rehberliri bilen tor arqiliq yighin ötküzdi Italiye parlaméntida ötküzülgen Uyghurlar we xongkong heqqide guwahliq bérish, axbarat élan qilish yighinidin körünüsh. 2020-Yili 1-iyul.
Photo: RFA

28-Féwral küni qirghizistan Uyghurliri "Ittipaq" jem'iyitining idariside dunya Uyghur qurultiyining rehberliri bilen tor arqiliq yighin ötküzüldi. Mezkur yighin qirghizistan Uyghurliri "Ittipaq" jem'iyiti we dunya Uyghur qurultiyining qirghizistandiki wakaletchisi rozimuhemmet abdulbaqiyéfning hemkarliqida uyushturuldi.

Mezkur tor yighinigha dunya Uyghur qurultiyining re'isi dolqun eysa, mu'awin re'isi erkin ekrem, ijra'iy komitétining re'isi ömer qanat ependi we bashqilar shundaqla qirghizistan Uyghurliri "Ittipaq" jem'iyitining re'isi esqer qasimof, "Ittipaq" jem'iyitining merkiziy kéngesh ezaliri, ayallar we yashlar kéngishining ezaliri bolup 30din oshuq kishi qatnashti.

Yighin jeryanida d u q rehberliri Uyghur xelqining bügünki weziyiti, lagérlar we mejburiy emgek mesilisi shundaqla xitay hakimiyiti élip barghan qirghinchiliq siyasitige qarshi turushta élip barghan pa'aliyetliri toghrisida tepsiliy chüshenche berdi shundaqla qirghizistandiki Uyghur jama'itining oy-pikirlirini anglidi. Bu tiptiki yighin qirghizistanda birinchi qétim uyushturuldi. Yighinning asasiy meqsiti qirghizistan Uyghurlirigha d u q pa'aliyetlirini biwasite anglitish we qirghizistan Uyghurlirini oyghitip heriketlendürgüch küch bérishtin ibaret iken. Radiyomiz ziyaritini qobul qilghan rozimuhemmet abdulbaqi, mezkur yighin meqsiti we mölcherlen'gen netijiler heqqide toxtaldi.
Mezkur yighin dawamida dolqun eysa ependi "Ittipaq" jem'iyitini uzun muddetlik teshkilat süpitide étirap qilip, uning Uyghur medeniyitini tereqqiy qildurushta muhim rol oynighanliqini tilgha aldi.

Tor arqiliq uyushturulghan mezkur yighin waqit cheklimisi bilen ikki sa'et dawam qildi, qatnashquchilar hayajanlinip, ular bilen özlirining pikir-tekliplirini ortaqlashti. Igilinishiche d u q rehberliri yene qazaqistandiki Uyghur jama'iti bilenmu tor arqiliq uchrashti. Radi'o ziyaritimizni qobul qilghan "Ittipaq" jem'iyitining merkiziy kéngesh ezasi kamiljan niyazof bu yighindin alghan tesiratliri heqqide toxtaldi.

Mezkur yighin'gha qatnashqan nowopokrowka yézisining Uyghur jama'etchilikning yigit-béshi gheyret jahanof, d u q ning élip barghan pa'aliyetliri we kélechek pilanliri toghrisida öz mehellisidikilerge yetküzidighanliqini tekitlidi.

Qirghizistan Uyghurliri "Ittipaq" jem'iyiti köp yillardin buyan dunya Uyghur qurultaylirigha qatniship, d u q rehberliri we herqaysi dölettiki Uyghur qérindashliri bilen didarliship turghanidi. Lékin korona wirus késili yamrap kétip nurghun yighin-pa'aliyetler emelge ashmidi, lékin qirghizistan Uyghur jama'etchiliki ümid bilen kélechekke yüzlenmekte. Kéyinki yillarda qirghizistan Uyghurlirining yashlirimu Uyghur mesilisige köngül bölüp tarixiy wetinidiki weziyetni tonup, ularning milliy kimliki we wetenperwer rohi kücheymekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet