Qirghizistan we özbékistandiki Uyghurlar 8-nöwetlik d u q wekillirini saylidi

Tashkenttiki Uyghur jama'et wekilliri. 2024-Yili 27-iyul, tashkent

27-We 28-iyul künliri dunyaning her qaysi jaylirida yashawatqan Uyghur jama'iti 8-nöwetlik dunya Uyghur qurultiyi (d u q) ning wekillirini saylash pa'aliyiti ötküzdi. Shu qatarida qirghizistan we özbékistan Uyghurlirimu jama'et ichidin qurultay wekillirini saylap chiqti.

28-Iyul küni qirghizistan Uyghurlirining saylam pa'aliyiti bishkek shehiridiki alamédin 1-mehelliside uyushturuldi. Jama'et topliship toqquz neper wekil bilen tonushup chiqti hemde ularni 8-nöwetlik d u q saylimigha qirghizistandin wekil qilip saylidi. Mezkur pa'aliyet 7-nöwetlik dunya Uyghur qurultiyining qirghizistandiki wekillirining teshebbusida uyushturuldi. Mezkur pa'aliyetke bishkek shehiri we uning etrapidiki Uyghurlar zich olturaqlashqan sheher we yézilarning wekilliri, ayallar jama'iti, yurt aqsaqalliri we jama'et erbabliri bolup 30 yéqin kishi qatnashti.

RFA/Feruze

Mezkur pa'aliyet d u q ning qirghizistandiki wakaletchisi rozimuhemmet abdulbaqiyéwning riyasetchilikide ötküzüldi. Riyasetchi 8-nöwetlik wekiller qurultiyining ehmiyiti, shundaqla kéyinki yillarda d u q ning qilghan pa'aliyetliri we muweppeqiyetlirini tonushturup ötti. Pa'aliyet dawamida d u q ning nizamnamisi we re'islikke körsitilgen namzatliri toghrisida so'allar otturigha qoyuldi. Riyasetchi tertip bilen her bir so'algha chüshenche berdi.

Lékin kéyinki yillarda d u q re'isi dolqun eysa ependi bilen bir septe turush jeryanida Uyghur jama'iti arisidin bir türküm wetenperwer Uyghurlar yétiship chiqqan.

RFA/Feruze

Mezkur pa'aliyettin ümidlen'gen nowopokrowka yéziliq ayallar kéngishining re'isi asiyem mallabaqiyéwa xanim radiyo ziyaritimizni qobul qildi. U 8-nöwetlik d u q gha yashlarning namzatliqqa körsitilgenlikidin we qirghizistan yashlirining oyghiniwatqanliqidin bek xursen bolghanliqini tilgha élip, d u q din chong ümidlerni kütidighanliqini bildürdi.

Melum bolushiche, 8-nöwetlik d u q gha öz namzatlirini körsitish üchün 1-iyulghiche torda tizimlitish zörür bolghan. Shu sewebtin qirghizistandin toqquz kishi özlirini wekil namzatliqigha körsetken. D u q ning teshkiliy hey'iti mezkur toqquz kishining namzatliqini maqullighan. Mezkur pa'aliyetke qatnashqan Uyghur jama'itining aq saqalliridin gheyret jahanow ependi radiyo ziyaritimizni qobul qilip, pa'aliyet heqqidiki tesiratlirini biz bilen ortaqlashti.

27-Iyul küni saylam pa'aliyiti yene özbékistanning tashkent shehiride ötküzüldi. Bu jaydiki pa'aliyet sérgili tumen nahiyesidiki Uyghur jama'itining teshebbusida uyushturuldi. Özbékistan jama'iti 8-nöwetlik d u q gha bilimlik we tejribilik üch neper wekilni ewetken bolup, filologiye penlirining doktori ruziyéwa dilber, hoquqshunas ilghar eliyéw we binakar eziz muptilayéwlar shular qataridin orun aldi.

RFA/Feruze

Mezkur pa'aliyetning teshkilligüchiliridin bolghan munajidin hawaydulayéw ependi radiyomiz ziyaritini qobul qilip, mezkur pa'aliyetning imkan qeder démokratik shekilde uyushturulghanliqini tilgha aldi, shundaqla özining hayajanliq tesiratini sözlep ötti.

Qirghizistan we özbékistan jumhuriyetliri ottura asiyadiki Uyghurlar bir qeder köp olturaqlashqan memliketlerdur. Bu döletlerdiki Uyghurlar Uyghur xelqining milliy musteqilliq yolida öz töhpilirini qoshushqa tiriship, imkaniyetning yar bérishiche tégishlik pa'aliyetlerni dawam qilip kelmekte.