Qirghizistan we rusiye Uyghurliri qurban héytta saxawetlik ishlarni qildi

Ixtiyariy muxbirimiz féruze
2022.07.11
Share on WhatsApp
Share on WhatsApp
qirghizistan-qurbanliq-qurban-heyt-3.jpg Qurban héytta mohtajlargha tarqalghan qurbanliq. 2019-Yili 11-awghust, qirghizistan.
RFA/Féruze

9-Iyul küni pütün dunya musulmanliri qurban héyti ötküzdi. Uyghur xelqimu özlirining dindashliri bilen birge muqeddes perzlirini ada qilip qurban héytta saxawetlik ishlarni qilishti.

Qirghizistan, qazaqistandin qalsa ottura asiyadiki Uyghurlar birqeder köp we zich olturushqan bir memliket, muhajirettiki Uyghurlar yene rusiyening sheherlirige köp sanda olturaqlashqan. Shu memliketlerde yashawatqan Uyghurlar özlirining milliy kimlikini, örp-adetlirini we diniy qa'ide-yosunlirini saqlap qélishigha tirishmaqta. Ene shularning biri qurban héyti we roza héyti qatarliq diniy we milliy bayramlarni ötküzüshtur.

Rusiyediki Uyghur jama'etchiliki qurban héyt namizini jama'et bilen oqup, saxawetlik ishlarni élip bardi. Radiyomiz ziyaritini qobul qilghan rusiye paytexti moskwa we sanktpétérburg sheherliridiki Uyghur jama'itining rehberliridin repqet sadiqof jama'et erbabi elishir nebijanning bashliqida mohtaj a'ililerge qurbanliq tarqatqanliqini bildürdi.

Qirghizistanning jenubidiki jalal-abad shehiride qurban héyti naghra chélinip tentenilik ötküzüldi. Bu sheherdimu melum sandiki Uyghurlar özbék, qirghiz qatarliq qérindashliri bilen birge yashawatqan bolup, Uyghur jama'et aktipliri mehellilerdiki balilargha türlük oyunlarni uyushturup ulargha sowghatlar tapshurushti. Qurban héytining kéyinki künliride, jalal-abad Uyghurliri bashqa musulman qérindashlirigha oxshash, mohtaj a'ililerge qurbanliq tarqitishti. Radiyomiz ziyaritimizni qobul qilghan jalal-abad oblastining aq-saqallar kéngishining ezasi elishir nasiraxunof jalal-abad shehiridiki birqisim chonglar we sebiylerni méhman qilip ulargha sowghatlarni tapshurghanlirini bildürdi.

Elishir ependi yene jalal-abad shehiri turghunlirigha türkiyediki qérindashliri ewetip bergen qurbanliqlirini tarqitip bergenlikini tekitlidi.

Qirghizistan'gha yene gérmaniye sherqiy türkistan uchur merkizidin abdujélil qaraqash ependi arqiliq qurbanliq ewetildi. Qirghizistan Uyghurliri “Ittipaq” jem'iyiti köp yillardin buyan gérmaniye sherqiy türkistan uchur merkizi bilen hemkarliqta yüzligen mohtaj a'ililerge qurbanliq gösh tarqitip kelmekte. Bu yili qirghizistan Uyghurliri “Ittipaq” jem'iyitining re'isi esqer qasimof we Uyghurlar zich olturaqlashqan mehellilerning yigit bashliri bilen qurbanliqlarni tarqitishqa mes'ul bolushti.

Qirghizistan Uyghur jama'itige yene dunya Uyghur qurultiyidin qurbanliq ewetildi. D u q ning qurbanliqlirigha qirghizistan Uyghurliri “Ittipaq” jem'iyitining sabiq re'isi dilmurat ekberof mes'ul boldi. Radiyomiz ziyaritini qobul qilghan dilmurat ependi dunya Uyghur qurultiyi we türk qérindashlirigha rehmitini bildürüp, qurbanliqlarni ayallar komitéti bilen hemkarliqta tarqitiwatqanliqini tekitlidi.

Adette ewetilgen qurbanliqlar millet ayrimastin mohtaj bolghan hemme a'ililerge tarqitilmaqta. Bu yilmu oxshash tarqitiliwatidu, lékin dunya Uyghur qurultiyi ewetken qurbanliqlar ayallar kéngishi arqiliq Uyghur a'ililerge tarqitilghan. Radiyomiz ziyaritimizni qobul qilghan nowopokrowka yézisining ayallar kéngishining re'isi asiyem mollabaqiyéwa ayallar kéngishining mohtaj a'ililerni öz nazaritide tutup ulargha her her xil bayramlarda heddiyelerni tapshurup köngül bölüp turghanliqini tekitlidi.

Qirghizistan Uyghurliri “Ittipaq” jem'iyitining muhim chariliridin biri-qirghizistan we dunya boyiche Uyghurlarni tonushturush: Uyghur xelqining medeniyet bayliqliri, örp-adetlirining qimmitini körsitishtur.

Hazir qirghizistanda hökümet sanliq melumati boyiche 60 ming etrapida Uyghur yashaydu. Uyghurlar özliri emeliyette Uyghurlarning uningdin köp ikenlikini éytishmaqta. Uyghurlar qirghizistan jumhuriyitining puqraliri bolush süpiti bilen bu döletning türlük xizmetlirige öz hessisini qoshup kelmekte shuningdek özlirining tili, medeniyiti we örp-adetlirinimu saqlimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.