Qirghizistan Uyghurliri gérmaniyediki Uyghur-türk teshkilatlirining qurbanliq yardimini tapshurup aldi

Ixtiyariy muxbirimiz féruze
2021-07-22
Share
Qirghizistan Uyghurliri gérmaniyediki Uyghur-türk teshkilatlirining qurbanliq yardimini tapshurup aldi Bu yilliq qurbanliqlar dunya Uyghur qurultiyi, gérmaniyediki türk fédératsiyesi we gérmaniyediki sherqiy türkistan uchur merkizidin ewetilgen. 2021-Yili 20-iyul, bishkek.
RFA/Féruze

Qurban héyit musulmanlarning eng muhim diniy bayramlirining biridur. Qirghizistan Uyghurliri héyt-ayemlerde özlirining dini perzlirini ada qilish bilen bir waqitta milliy en'enilirini dawam qilishqa tirishmaqta. 20-Iyul küni qirghizistandiki Uyghur jama'iti özliri turushluq jaylardiki meschitlerge topliship, qurban héyt namizini birlikte oqudi. Qurban héyt namizidin kéyin qirghizistan Uyghurliri tupraq béshini ziyaret qiliship, merhumlarning rohigha atap qur'an tiliwet qilishti, andin öyliride qurbanliq qiliship, öz ara héytliship, héyt keypiyatini yoqiri kötürdi.

Qirghizistan Uyghurliri "Ittipaq" jem'iyiti köp yillardin buyan ulugh qurban héyit bayrimida saxawetlik ishlarni élip barmaqta. Bu yilliq qurban héyt mezgilide "Ittipaq" jem'iyitining bashchiliqida qirghizistanning chu wilayitidiki yézilarda olturaqlashqan 400 oshuq mohtaj a'ililerge qurbanliq gösh tarqitildi. Bu yilliq qurbanliqlar dunya Uyghur qurultiyi, gérmaniyediki türk fédératsiyesi we gérmaniyediki sherqiy turkistan uchur murkizidin ewetilgen idi.

Rozimuhemmet abdulbaqi we esqer qasimof d u q, gérmaniyediki türk fédératsiyesi we gérmaniyediki sherqiy türkistan uchur merkizidin ewetilgen qurbanliqlarni mohtajlargha tarqitish üchün teyyarlanmaqta. 2021-Yili 20-iyul, bishkek.
Rozimuhemmet abdulbaqi we esqer qasimof d u q, gérmaniyediki türk fédératsiyesi we gérmaniyediki sherqiy türkistan uchur merkizidin ewetilgen qurbanliqlarni mohtajlargha tarqitish üchün teyyarlanmaqta. 2021-Yili 20-iyul, bishkek.

Qirghizistan Uyghurliri "Ittipaq" jem'iyitining re'isi esqer qasimow ziyaritimizni qobul qilip, "Ittipaq" jem'iyitining qurbanliq tarqitish saxawetlik ishlirining on yildin buyan dawam qiliwatqanliqini tilgha aldi.

Qirghizistan Uyghurliri "Ittipaq" jem'iyiti her yilliq rozi héyt we qurban héyt mezgilide qirghizistan we dunyadiki Uyghurlarning ehwalini jama'etke tonushturup kelmekte. Shuning bilen bir waqitta yene Uyghur xelqining medeniyet bayliqliri, örp-adetlirini yash-ösmürlerge bildürüp kelmekte.

Dunya Uyghur qurultiyining qirghizistandiki wakalatchisi rozimuhemmed abdulbaqi ziyaritimizni qobul qilip, qurbanliqlarni ewetken dunya Uyghur qurultiyi we gérmaniyediki türk qérindashlargha teshekkürini bildüra'i. U korona wirusi wabasi seweblik iqtisad töwenlep, kishilerning turmushi nacharliship qalghanliqini, emma chet ellerdiki qérindashlarning her yilliq héyt-ayemlerde özlirige yardem qolini sunuwatqanliqini bayan qildi.

Qurbanliq tarqitish üchün qirghizistan Uyghurliri "Ittipaq" jem'iyiti mexsus bir komitét qurdi. Bu komitét köp yillardin buyan saxawet ishlirini ilgiri sürüp kelmekte. Deslep yézilardiki yigit bashliri teripidin yétim-miskinlerning tizimliki teyyarlinidu, andin qurbanliq qoy we kala teyyarlinidu, kéyin pakiz qushxanilar tallinip, qurbanliq késilidu. Parchilinip teyyar bolghan qurbanliqlarni deslep yézilargha, andin sheherlerdiki yigit bashliri arqiliq mehellilerge ewetilidu.

"Ittipaq" jem'iyiti qurbanliq komitétining ezasi repqet yüsüpow ziyaritimizni qobul qilip, qurbanliqlarni ewetken wetenperwer yigitlerge öz rehmitini bildürdi, shundaqla özining ilgiri ghulja shehiride héyt ötküzgenlikini eslep ötti.

Qirghizistan ottura asiyadiki Uyghurlar bir qeder köp we zich olturaqlashqan memliket bolup, bu eldiki Uyghurlar özlirining milliy we diniy en'enilirini yaxshi saqlap kelmekte. Hazir qirghizistanda hökümetning sanliq melumati boyiche 60 ming etrapida Uyghur yashaydu. Emma Uyghurlar özliri bolsa nopusining buningdin köp ikenlikini éytishmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet