قىرغىزىستاندا «ئىرپان فېست» نامىدىكى ئۇيغۇر مەدەنىيەت فېستىۋالى باشلاندى

18-ئاۋغۇست كۈنى قىرغىزىستاننىڭ ئىسسىق كۆل ۋىلايىتىدىكى توڭ يېزىسىدا «ئىرپان فېست» نامىدا ئۇيغۇر مەدەنىيەت فېستىۋالى باشلاندى. مەزكۇر فېستىۋالغا قىرغىزىستان، قازاقىستان، ئۆزبېكىستان ۋە باشقا ئەللەردىن كەلگەن ئۇيغۇر سەنئەتكار، شائىرلار ۋە زىيالىيلار قاتنىشىپ، ئۆز ماھارەتلىرىنى نامايان قىلماقتا.

«ئىرپان فېست» دەپ ئاتالغان مەزكۇر فېستىۋال «ئېرپان» ئۇيغۇر تەرەققىيات پىروگراممىلىرىنى قوللاش فوندى تەرىپىدىن ئۇيۇشتۇرۇلدى. مۇراسىم تۆت كۈن داۋام قىلىدىغان بولۇپ، ئۇنىڭدا ئۇيغۇر تىلى، مەدەنىيىتى ۋە تارىخى توغرىسىدىكى تۈرلۈك مەزمۇنلار كۆرگەزمە قىلىنىدىكەن.

«ئىرپان فېست» فېستىۋالى 17-ئاۋغۇست كۈنى بىشكەك شەھىرىدە چەت ئەللەردىن كەلگەن مېھمانلارنى كۈتۈۋېلىش پائالىيىتى ۋە بىرلىكتە ناشتىلىق قىلىش بىلەن باشلاندى. ئاندىن فېستىۋال ۋەكىللىرى كوللېكتىپ ھالدا تاغلارنى ئارىلاپ ئىسسىق كۆل تەۋەسىگە ساياھەتكە چىقىشتى.

«ئىرپان» فوندىنىڭ رەئىسى نۇرمۇھەممەت كەنجىيېۋ ئەپەندى رادىيومىز زىيارىتىنى قوبۇل قىلىپ، مەزكۇر مۇراسىمنىڭ مەقسىتى توغرىسىدا توختىلىپ ئۆتتى. ئۇ، بۈگۈنكى كۈندە ئۇيغۇرلارنىڭ جەم بولۇشى ۋە ئۇيغۇر مەدەنىيىتى توغرىسىدا مەخسۇس پائالىيەت ئۆتكۈزۈشى، مۇھىم تېمىلارنىڭ بىرى دەپ تەكىتلىدى.

مەزكۇر مەدەنىيەت مۇراسىمى باشلانغان فېستىۋال مەيدانى ئۇيغۇر مىللىي بۇيۇملىرى ۋە ئۇيغۇر خەلقىنىڭ ھاياتى تەسۋىرلەنگەن رەسىملەر بىلەن زىننەتلەندى. قازاقىستاندىن كەلگەن «چېۋەر قول» ئۇيۇشمىسىنىڭ خانىم-قىزلىرى مۇراسىم قاتناشقۇچىلىرىنى ئۇيغۇر مىللىي تائاملىرى بىلەن كۈتۈۋېلىشتى. رادىيومىز زىيارىتىنى قوبۇل قىلغان «چېۋەر قول» ئۇيۇشمىسىنىڭ رەئىسى ئىلياكوۋا مەرۋانەم خانىم «ئىرپان فېست» مۇراسىمىغا قاتنىشىپ، ئۆزلىرىنىڭ مىللىي ئەنئەنىلىرىنى ۋە ھۈنەرلىرىنى نامايان قىلغانلىقىدىن بەكمۇ خۇرسەن بولغانلىقىنى ئىزھار قىلدى.

مەزكۇر مۇراسىم قىرغىزىستان دۆلەت گېمىنى ۋە ئېرپان فوندىنىڭ رەئىسى نۇرمۇھەممەت كەنجىيېۋنىڭ ئېچىلىش سۆزى بىلەن باشلاندى، ئاندىن كونسېرت پىروگراممىلىرى كۆرسىتىلدى.

ئۆزبېكىستاندىن قاتناشقان سەنئەت دوكتورى، ئۆزبېكىستان دۆلەت كونسېرۋاتورىيەسىدىكى ئۇيغۇر مۇقام بۆلۈمىنىڭ ئوقۇتقۇچىسى گۈلزىرە ئابلەت خانىم، فېستىۋال ئەھلىگە ئۇيغۇر ناخشىلىرىنى تەقدىم قىلدى. ئۆزبېكىستاندىن كەلگەن ھەكىمە ۋېلياموۋانىڭ رەھبەرلىكىدىكى «ئەلنۇرە» ۋوكال ئانسامبىلى، قازاقىستاندىن كەلگەن «دوستلۇق» مىللىي چالغۇ ئەسۋابلار ئانسامبىلى، نادىيا رېمباكىيېۋانىڭ رەھبەرلىكىدىكى «ياشلار ئاۋازى» ۋوكال توپى، ياركەنتتىن كەلگەن ئوغلەم تاھىروۋانىڭ رەھبەرلىكىدىكى «دىل ساز» مۇقام ئانسامبىلى ۋە يەنە باشقا سەنئەت سۆيەرلەر ئۆزلىرىنىڭ ناخشىلىرى ۋە ئەۋرىشىم ئۇسسۇللىرى بىلەن تاماشىبىنلارنىڭ قەلبىنى لەرزىگە سېلىشتى.

مەزكۇر مۇراسىمغا قاتناشقان «دوستلۇق» مىللىي مۇزىكا ئانسامبىلىنىڭ ئۇستازى سابىرجان ماناشوۋ رادىيومىز زىيارىتىنى قوبۇل قىلىپ، مەزكۇر فېستىۋالنىڭ ياش ئەۋلادلار ئۈچۈن ئەھمىيىتى زور بولغان بىر پائالىيەت ئىكەنلىكىنى ئىلگىرى سۈردى.

«ئېرپان فېست» پائالىيىتى داۋامىدا يەنە ياش رەسساملار كۆرگەزمىسى بولۇپ ئۆتتى. شۇ كۆرگەزمىگە ئۆزلىرىنىڭ ئەسەرلىرىنى نامايان قىلغان سابرىنا تەلىبجانوۋا زىيارىتىمىزنى قوبۇل قىلىپ، ئۆز رەسىملىرىدە ئۇيغۇر خەلقىنىڭ تارىخى ۋە ئىجتىمائىي ھاياتىنى تەسۋىرلىگەنلىكىنى تىلغا ئېلىپ «يەتتى قىزلىرىم» ئەسىرى توغرىسىدا تەپسىلىي توختالدى.

ئۇيغۇر مەدەنىيىتى ھەققىدىكى بۇ فېستىۋال قىرغىزىستاندا بىرىنچى قېتىم ئۆتكۈزۈلۈۋاتقان بولۇپ، ئوتتۇرا ئاسىيادىكى ھەر قايسى دۆلەتلەردىن كەلگەن ئۇيغۇر ۋەكىللىرى ئۆزلىرىنىڭ تەبرىك سۆزلىرى ۋە يۈرەك سۆزلىرىنى «ئىرپان» فوندىغا، شۇنداقلا بۇ پائالىيەتنى تەشكىللىگۈچىلەرگە ئىزھار قىلىشتى. مۇراسىمنىڭ ئاخىرىدا «ئېرپان» ئۇيغۇر تەرەققىيات پىروگراممىلىرىنى قوللاش فوندى قازاقىستان، ئۆزبېكىستان ۋە قىرغىزىستاندىكى سەنئەت توپلىرىنىڭ رەھبەرلىرىنى، شۇنداقلا شائىر ۋە ئىلىم ئىگىلىرىنى مېدال، سوۋغات ۋە تەقدىرنامىلەر بىلەن مۇكاپاتلىدى.