Чәтәлләрдики мусулманлар җамаити қирғизистан уйғурлириға "қурбанлиқ" әвәтип бәрди

Ихтиярий мухбиримиз ферузә
2019-08-13
Share
qirghizistan-qurbanliq-qurban-heyt-1.jpg Қурбан һейтта розимуһәммәт абдубақиниң башчилиқидики қурбанлиқ комитети. 2019-Йили 11-авғуст, қирғизистан.
RFA/Féruze

Бу йиллиқ қурбан һейтта чәтәлләрдики мусулманлар җамаити қирғизистандики уйғурларға халис ярдәм көрситип, "қурбанлиқ" әвәтип бәрди.

Буларниң ичидә һиндонезийә мусулманлириниң бир аммиви тәшкилати билән германийәдики түрк қериндашлар тәрипидин әвәтилгән қурбан һейтлиқ ярдәмләр һәммидин көп болди.

11-Авғуст күни қирғизистандики уйғурлар бу дөләттә яшаватқан барлиқ мусулманлар билән бирликтә улуғ қурбан һейт намизини оқуди. Һейт намизи мәмликәтниң һәрқайси җайлиридики мәсчитләрдә вә пайтәхт бишкәк шәһириниң мәркизий мәйданида бирла вақитта оқулди.

Қирғизистан уйғурлири "иттипақ" җәмийити уюштурған қурбанлиқ тарқитиш комитетиниң әзалири һейт намизидин кейин сахавәтлик ишларни башлиди. Қурбанлиқлар бишкәк шәһири вә новопокровка йезисидики қушханиларда тәйяр қилинди. Қурбанлиқларни тәйярлаш вә тарқитиш ишлириға розимуһәммәт абдулбакийеф вә мирзакерәм абдуллайефлар мәсул болди.

Қирғизистан оттура асиядики бир кичик бир дөләт болуп, 1991-йили сабиқ совет иттипақи йиқилғандин кейин мустәқил болған. Шуниңдин буян та бүгүнгичә қирғизистан билән һиндонезийә арисида һечқандақ иқтисадий, иҗтимаий вә аммиви тәшкилатлар арисида сахавәтлик мунасивәтләр болмиған иди. Әмма бу йили һиндонезийә мусулманлири қирғизистандики уйғурларға атап қурбанлиқ әвәтти.

Радийомиз зияритини қобул қилған розимуһәммәт абдулбақийеф һиндонезийәдики мусулманлар җамаитиниң қирғизистандики уйғурларға қурбанлиқ еветкәнлиги дуня уйғур қурултийиниң йеқиндин буян елип бериватқан тәшвиқатлириниң нәтиҗиси, дәп көрсәтти.

Розимуһәммәт әпәнди йәнә бәзи ислам дөләтлири һөкүмәтлириниң хитай һөкүмитини қоллаватқанлиқидин қаттиқ әпсусланғанлиқини билдүрди. Әмма у бу дөләтләрдики авам пуқралар әгәрдә уйғур мәсилисини яхши чүшәнсә, улар келәчәктә өз дөләтлириниң уйғур мәсилисидә иҗабий қәдәм елишиға тәсир көрситиши мумкин дегән үмидтә икәнликини изһар қилди.

Һиндонезиядики аст тәшкилатиниң әзаси суҗита при рамадинда радийомиз зияритини қобул қилип, мундақ деди: "биз һиндонезийә мусулманлири уйғур мәсилисиниң җиддийликини өткән йилниң ахирида таратқулар арқилиқ билдуқ. Йәни 2018-йили һиндонезийәдә миңға йекин киши хитай әлчиханисиниң алдида намайиш қилди. Намайишчилар хитай һөкүмитиниң уйғур мусулманлири үстидин йүргүзүватқан бесим сиясәтлиригә өз қаршилиқи вә наразилиқлирини билдүрүшти. Бизниң тәшклатимиз хитайниң уйғурларға елип бериватқан зулумлириға алаһидә көңүл бөлүватимиз. Бәзиләр өз позитсийәсини билдүрүш үчүн хитайға қарши намайишларға пәқәт пайтәхт җакартадила әмәс, бәлки һиндонезийәдики башқа шәһәрлиридиму намайишларни уюштурумақта. Йәнә һиндонезийәдики мусулман аммиси өз ярдимини бизниң тәшкилатимиз арқилиқ уйғурларға әвәтмәктә. Биз қирғизистандин башқа йәнә түркийә, мисир, қазақистан вә өзбекистандики уйғур җамаәтлиригиму қурбанлиқларни әвәттуқ."

11-12-Авғуст күнлири қирғизистан уйғурлириға йәнә германийәдики түрк қериндашлар вә дуня уйғур қурултийи әвәткән қурбанлиқлар тарқитип берилди. Қурбанлиқ аввал чу вилайитидики новопокровка, кәң булуң, төкүлташ, лебединовка йезиларида вә тохмақ шәһиридә яшаватқан уйғурларға вә улар билән биллә яшайдиған башқа милләтләргиму тарқитилди.

Радийомиз зияритини қобул қилған қурбанлиқ комитетиниң әзаси мирзаәхмәт садикоф қурбанлиқлар тизимлик бойичә мәһәллиләрдики йигит башлири арқилиқ еветилгәнлигини билдүрди.

Қурбанлиқ һейт күни қирғизистан уйғурлириниң "иттипақ" тәшкилати 600 ға йеқин аилигә қурбанлиқ тарқатти. Қурбанлиқ һейтниң дәсләпки үч күн җәрянида икки миңға йеқин аилә вә дохтурхана, мейипләр орунлириға қурбанлиқ тарқитилидикән.

"иттипақ" җәмийитиниң рәиси әсқәр қасимоф зияритимизни қобул қилип, ярдәм көрсәткән тәшкилатларға өз минәтдарлиқини билдүрди.

Қирғизистан уйғурлириниң "иттипақ" җәмийити шәрқий түркистан учур мәркизиниң һәмкарлиқида сахавәтлик ишларни йәнә үч-төт күнгичә давамлаштуридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт