Қирғизистан уйғурлири өз зиялийлири билән учрашти

Юлтуз ансамбили уссул орундимақта

24-Июн күни бишкәктә қирғизистан уйғур зиялийлириниң уйғур хәлқи билән йүзтуранә учришиши болуп өтти. Мурасим қирғизистан уйғурлириниң “иттипақ” җәмийити илим-пән комитетиниң тәшәббускарлиқида уюштурулди. Бу қетимқи учришишта қирғизистан җумһурийитиниң илим-пән вә мәдәнийитиниң тәрәққиятиға төһпә қошқан уйғур зиялийлири билән йеқиндин тонушуш, шундақла бирликтә нөвәттики мәсилиләрни һәл қилиш чарисини тепиш мәқсәт қилинди.

Мурасим бишкәк шәһириниң әтрапидики “арзу” қәһвәханисида уюштурулди. Мәзкур паалийәткә мәшһур рәссам сабитҗан бабаҗанов, медитсина вә илим-пән саһәсидә хизмәт көрсәткән профессор вә кандидат намзатлар, шундақла юқири дәриҗилик тәқдирнамиләргә еришкән җамаәт әрбаблири болуп 24 уйғур зиялийси қатнашти.

RFA/Feruze

Мәзкур паалийәт “юлтуз” уссул ансамбилиниң “қизил гүл” уссули билән тәнтәнилик башланди. Йиғинниң башлинишида қирғизистан уйғурлири “иттипақ” җәмийитиниң рәиси турсунтай салимов йиғин әһлигә қизғин салам йоллап, бу қетимқи мурасимниң әһмийити тоғрисида сөз қилди. Шундақла ана тил мәсилисини һәл қилиш йолида ишләнгән хизмәтләрни тонуштуруп өтти. Мәзкур паалийәткә қатнашқан сабитҗан бабаҗанов радийомиз зияритини қобул қилип бу қетимқи мурасимдин алған тәсиратлирини биз билән ортақлашти.

Мурасим давамида қирғизистандики мәрһум академик әзиз наринбайевниң қизи аззухан наринбайева өз дадиси тоғрисида доклат бәрди. Болупму у әзиз наринбайевниң вәтәнпәрвәрлик вә милләтпәрвәрлик характерини тилға алди. Йиғинда йәнә дохтур вә җамаәт әрбаби мәрһум назим қәмбири тоғрисида сиңлиси нурания қасимова доклат бәрди.

RFA/Feruze

Паалийәт давамида йиғин иштракчилири өзлириниң хизмити вә утуқлирини көпчилик билән ортақлашти. Мәлум болғинидәк йиғин мәйданидики нурғун кишиләр бир-бирсини тонушмайдиған болуп, улар өз хәлқи ичидә мушундақ мувәппәқийәт қазанған кишиләрниң барлиқидин толиму пәхирлиништи. “мунәввәр маарип әрбаби” намиға еришкән дилбар баяхунова радио зияритимизни қобул қилип, йиғин давамида музакирә қилинған мәсилиләр, җүмлидин ана тил мәсилиси тоғрисида сөзләп өтти.

RFA/Feruze

RFA/Feruze

Мәлум болушичә, бу хил мурасимниң уюштурулуши уйғур җамаити арисида тунҗи қетим болуватқан ишлардин икән. Қирғизистан уйғурлири “иттипақ” җәмийити илим-пән комитетиниң рәиси нелифәр ғазийеваниң дейишичә, бу қетимқи мурасим асаслиқи уйғурларни бир-бири билән тонуштуруш вә иттипақлаштуруш үчүн уюштурулған. Нелифәр ханим бу һәқтә сөз қилип өзиниң “иттипақ” җәмийитиниң хизмити билән техиму чоңқур тонушмақчи болғанлиқини изһар қилди.

Қирғизистан оттура асиядики йәттә милйон нопуслуқ бир мәмликәт болуп, уйғурлар омумий нопусниң бәш пирсәнтини игиләйду. Қирғизистан уйғурлири ичидә һәр саһә бойичә йетишип чиққан, шуниңдәк өз маһарәтлирини көрситип алий дәриҗилик мукапатларға еришкән, һәтта хәлқаралиқ сәһниләрдә даңқ чиққан инсанлар аз әмәс. Уларниң арисида қирғиз совет иттипақиға өз әмгики арқилиқ төһпә қошқан кино артиси айтурған темирова, совет итттипақиниң тәнтәрбийә маһири, даңлиқ путболчи йүсүп мусайев, мәрһум академик әзиз наринбайев, уйғур сәнитиниң чолпан юлтузлиридин мәрһум айтурған һасанова, қирғизистан хәлқ артиси султан кәримов, қирғизистан сәнитигә төһпә қошқан рәссам сабитҗан бабаҗанов, қирғизистан сәнитигә әмгәк сиңдүргән рәссам тәләт мирраһимов, “сәһийә мунәввәр әрбаби” , профессор нурмуһәммәд бабаҗанов вә башқиларни көрситиш мумкин.