Qirghizistan Uyghurliri öz ziyaliyliri bilen uchrashti

Yultuz ansambili ussul orundimaqta

24-Iyun küni bishkekte qirghizistan Uyghur ziyaliylirining Uyghur xelqi bilen yüzturane uchrishishi bolup ötti. Murasim qirghizistan Uyghurlirining “Ittipaq” jem'iyiti ilim-pen komitétining teshebbuskarliqida uyushturuldi. Bu qétimqi uchrishishta qirghizistan jumhuriyitining ilim-pen we medeniyitining tereqqiyatigha töhpe qoshqan Uyghur ziyaliyliri bilen yéqindin tonushush, shundaqla birlikte nöwettiki mesililerni hel qilish charisini tépish meqset qilindi.

Murasim bishkek shehirining etrapidiki “Arzu” qehwexanisida uyushturuldi. Mezkur pa'aliyetke meshhur ressam sabitjan babajanow, méditsina we ilim-pen saheside xizmet körsetken proféssor we kandidat namzatlar, shundaqla yuqiri derijilik teqdirnamilerge érishken jama'et erbabliri bolup 24 Uyghur ziyaliysi qatnashti.

RFA/Feruze

Mezkur pa'aliyet “Yultuz” ussul ansambilining “Qizil gül” ussuli bilen tentenilik bashlandi. Yighinning bashlinishida qirghizistan Uyghurliri “Ittipaq” jem'iyitining re'isi tursuntay salimow yighin ehlige qizghin salam yollap, bu qétimqi murasimning ehmiyiti toghrisida söz qildi. Shundaqla ana til mesilisini hel qilish yolida ishlen'gen xizmetlerni tonushturup ötti. Mezkur pa'aliyetke qatnashqan sabitjan babajanow radiyomiz ziyaritini qobul qilip bu qétimqi murasimdin alghan tesiratlirini biz bilen ortaqlashti.

Murasim dawamida qirghizistandiki merhum akadémik eziz narinbayéwning qizi azzuxan narinbayéwa öz dadisi toghrisida doklat berdi. Bolupmu u eziz narinbayéwning wetenperwerlik we milletperwerlik xaraktérini tilgha aldi. Yighinda yene doxtur we jama'et erbabi merhum nazim qembiri toghrisida singlisi nuraniya qasimowa doklat berdi.

RFA/Feruze

Pa'aliyet dawamida yighin ishtrakchiliri özlirining xizmiti we utuqlirini köpchilik bilen ortaqlashti. Melum bolghinidek yighin meydanidiki nurghun kishiler bir-birsini tonushmaydighan bolup, ular öz xelqi ichide mushundaq muweppeqiyet qazan'ghan kishilerning barliqidin tolimu pexirlinishti. “Munewwer ma'arip erbabi” namigha érishken dilbar bayaxunowa radi'o ziyaritimizni qobul qilip, yighin dawamida muzakire qilin'ghan mesililer, jümlidin ana til mesilisi toghrisida sözlep ötti.

RFA/Feruze

RFA/Feruze

Melum bolushiche, bu xil murasimning uyushturulushi Uyghur jama'iti arisida tunji qétim boluwatqan ishlardin iken. Qirghizistan Uyghurliri “Ittipaq” jem'iyiti ilim-pen komitétining re'isi nélifer ghaziyéwaning déyishiche, bu qétimqi murasim asasliqi Uyghurlarni bir-biri bilen tonushturush we ittipaqlashturush üchün uyushturulghan. Nélifer xanim bu heqte söz qilip özining “Ittipaq” jem'iyitining xizmiti bilen téximu chongqur tonushmaqchi bolghanliqini izhar qildi.

Qirghizistan ottura asiyadiki yette milyon nopusluq bir memliket bolup, Uyghurlar omumiy nopusning besh pirsentini igileydu. Qirghizistan Uyghurliri ichide her sahe boyiche yétiship chiqqan, shuningdek öz maharetlirini körsitip aliy derijilik mukapatlargha érishken, hetta xelq'araliq sehnilerde dangq chiqqan insanlar az emes. Ularning arisida qirghiz sowét ittipaqigha öz emgiki arqiliq töhpe qoshqan kino artisi ayturghan témirowa, sowét itttipaqining tenterbiye mahiri, dangliq putbolchi yüsüp musayéw, merhum akadémik eziz narinbayéw, Uyghur sen'itining cholpan yultuzliridin merhum ayturghan hasanowa, qirghizistan xelq artisi sultan kerimow, qirghizistan sen'itige töhpe qoshqan ressam sabitjan babajanow, qirghizistan sen'itige emgek singdürgen ressam tel'et mirrahimow, “Sehiye munewwer erbabi” , proféssor nurmuhemmed babajanow we bashqilarni körsitish mumkin.