Qirghizistan Uyghurliri "Meshrep putbol musabiqisi" ötküzdi

Ixtiyariy muxbirimiz féruze
2019-04-29
Élxet
Pikir
Share
Print
Bishkek shehiride "Yashliq awazi" namliq bir top Uyghur yashlirining teshebbuskarliqida ötküzülgen "Meshrep" namida putbol musabiqisige qatnashqan komandilar. 2019-Yili 28-aprél, qirghizistan.
Bishkek shehiride "Yashliq awazi" namliq bir top Uyghur yashlirining teshebbuskarliqida ötküzülgen "Meshrep" namida putbol musabiqisige qatnashqan komandilar. 2019-Yili 28-aprél, qirghizistan.
RFA/Féruze

27-28 Aprél künliri bishkek shehiridiki Uyghurlar "Meshrep" namida putbol musabiqisi ötküzdi. Bu musabiqe "Yashliq awazi" namliq bir top Uyghur yashlirining teshebbuskarliqida uyushturuldi.

Mezkur musabiqige bishkek shehiri we uning etrapidiki lébédinowka, nowopokrowka, chet köl qatarliq yézilardin kelgen meshrep ehlidin 18 guruppa qatnashti. Musabiqining tertipi boyiche her bir guruppa bir meshrep bolup, her bir meshrep guruppisi bir putbol komandisi süpitide musabiqige qatnashti. Musabiqige qatnashqan bu tenheriketchiler ؛chonglar we yashlar guruppisidin ibaret ikkige ayrilip, musabiqige chüshken. Chonglar guruppisi 35 yashtin 65 yashqiche bolghan isportchilardin, yashlar guruppisi bolsa 14 yashtin 35 yashqiche bolghan isportchilardin terkib tapqan.

"Yashliq awazi" topining ezasi nurshat ebeydullayéfning éytishiche, "Meshrep putbol musabiqisi" ning asasiy meqsiti Uyghur yashlirining bir biri bilen yéqin alaqe-munasiwetlerde bolup, bir-birini hörmetlep, wetenperwerlik rohini kücheytish iken.

"Meshrep putbol musabiqisi" 2014 yildin buyan her yili baharda uyushturulup kélinmeke. Peqet ötken yili, yeni 2018 yili, Uyghur diyaridiki éghir weziyet tüpeylidin, qirghizistandiki Uyghur jama'iti her xil oyun-tamashilarni toxtatqan idi. Shularning qatarida "Meshrep putbol musabiqisi" mu ötküzülmigen. Nurshat ebeydullayéf ependi bu heqte toxtaldi.

Meshreplerning putbol musabiqisige qatnashqan guruppiliridin tüzülgen komandilarning namliri meshhur Uyghur ölimalarning isimliri, Uyghur diyaridiki sheher we nahiyelerning namliri, Uyghur ta'amliri we bashqa Uyghur medeniyitige munasiwetlik atalghular bilen atalghan. Bu qétimqi musabiqige qatnashqan putbol komandiliri özlirige méwilerning Uyghurche namlirini ishletken. Musabiqe teshkilligüchilirining éytishiche, mundaq qilishtiki meqset musabiqe jeryanida yashlarning öz milliy medeniyiti, öz ana tili we tarixi qatarliqlarni bilishini qolgha keltürüshtin ibaret iken.

Musabiqilerning yuqiri derijide ötüshi üchün qirghizistan putbolchilar birleshmisidin mexsus wekiller teklip qilin'ghan. Radiyo ziyaritimizni qobul qilghan ikki wekil, yeni musabiqining nazaretchisi irina doroféyéwa we swétlana abramowalar, musabiqining yuqiri keypiyatta bolghanliqi, isportchilarning yaxshi teyyarliq qilghanliqi we öz'ara hörmet qiliship, musabiqe jeryanida urush-talash qilmighanliqini éytishti. Ular yene mezkur musabiqe komandilirining namlirini bek yaqturghanliqi we Uyghurlar heqqide özlirimu köp yéngiliqlarni biliwalghanliqlirini izhar qilishti.

Musabiqining chonglar qismida putbol oynighan chet köl yézisining meshrep ezasi eziz xudaberdiyéf, özining bu musabiqige tunji qétim qatnishiwatqanliqini, musabiqe jeryanida yashlarning chonglargha qarap tertip ögen'genliki we musabiqining yuqiri keypiyatta ötkenlikini sözlep ötti.

Bishkek shehiri yénidiki Uyghurlar zich olturaqlashqan nowopokrowka yézisidin "Meshrep putbol musabiqisi" ge ikki meshrep guruppisi qatnashti. Bu guruppilarni teyyarlighan sübhi eysarof bu musabiqiler arqiliq balilarning bir-birliri bilen tonushqanliqini éytti.

Mezkur yézining "Shaptul" dep atalghan meshrep komandisining yigit béshi arafat özlirining birinchilikke érishish ümidi barliqini tekitlidi.

Arafat ependi yene nowopokrowka yézisidiki meshrepler heqqide toxtilip, bu jaydiki meshrep ehlining chonglar, yashlar we kichikler meshripi dep atalghan üch guruppigha bölün'genliki we bu arqiliq yézidiki Uyghurlarni ittipaqlashturushqa, Uyghur medeniyiti, tili we örp-adetlirini saqlap qélishqa tirishiwatqanliqini bildürdi.

Ikki künlük musabiqe netijiside "Pédigen" komandisi birinchilikke érishti.

Melumki, Uyghurlar qirghizistandiki asasliq az sanliq milletlerning biri. Ular asasen bishkek shehiri we uning etrapidiki yézilargha, az bir qismi qaraqol, osh, qarabalta qatarliq sheherlerge tarqalghan. Qirghizistan Uyghurlirining xéli köp qismini 1950-1960-yillarda Uyghur élidin köchüp kélip yerleshkenler we ularning ewladliri igileydu.

Toluq bet