Қирғизистан уйғурлири норуз байримини дағдуғилиқ өткүзди

Ихтиярий мухбиримиз ферузә
2019-03-22
Елхәт
Пикир
Share
Принт
Қирғизистанда өткүзүлгән норуз паалийитидин бир көрүнүш. 2019-Йили 21-март. Қирғизистан.
Қирғизистанда өткүзүлгән норуз паалийитидин бир көрүнүш. 2019-Йили 21-март. Қирғизистан.
RFA/Feruze

Қирғизистанда норуз байрими мунасивити билән дөләтниң һәрқайси шәһәр-йезилирида тәнтәнилик қутлаш паалийәтләр болуп өтти.

Бишкәк шәһиридики мәркизий мәйданида тәбрикләш паалийәтлири өткүзүлүп, қирғизистанда яшаватқан һәр милләт хәлқи өзлириниң миллий сәнәт маһарәтлирини намаян қилди вә миллий көргәзмиләрни ачти. «Иттипақ» уйғур җамаитиму тәбрикләш паалийәтлиригә актиплиқ билән қатнишип, уйғур миллий нахша-уссуллирини орундиди. Миллий буюмлар вә чалғу әсваблар көргәзмиси уюштурди.

Қирғизистан йезилириниң уйғурлар топлишип олтурақлашқан мәһәллилиридә норуз байрими дағдуғилиқ өткүзүлүп, аяллар кеңәшлири «мәнму уйғур» паалийитигә актиплиқ билән қатнашти.

Беловодский йезисида уйғур җамаәтчиликиниң башчилиқида өзбек, таҗик, қирғиз һәтта украин вә герман хәлқлири бирликтә тәнтәнилик билән норуз байримини қутлиди. Йеза турғунлирини тәбрикләш үчүн кәлгән йезилиқ һөкүмәт башлиқи асқаров бәктур, тәптиш һәйитиниң рәиси рәһимбәк мәмәткеримоф, қирғизистан уйғурлири «иттипақ» җәмийитиниң рәиси артиқ һаҗийеф вә җамаәт әрбаблири өз нутуқлирида тинчлиқ-хатирҗәмликни вә милләтләр ара иттипақлиқини халайдиғанлиқлирини изһар қилишти. 

Тәнтәнилик мурасимға йеза турғунлиридин сирт бишкәк вә кара балта шәһәрлиридин кәлгән меһманлар болуп, 300 дин артуқ киши қатнашти. Норуз байримидин пайдилинип уйғур җамаити аяллар кеңишиниң әзалири «мәнму уйғур» паалийитигә актиплиқ билән қатнашти. Радийомиз зияритини қобул қилған нилуфәр һашимова ханим дуняниң һәр қайси җайлирида яшаватқан уйғур қериндашлирини норуз байрими билән тәбрикләп, «мәнму уйғур» паалийитигә актиплиқ билән қатнишишқа чақирди.

Мәзкур мурасимда уйғур балилар миллий уссулларни орундап, нахшиларни ейтип, меһманларниң вә йеза турғунлириниң көңүллирини ачти. Чоңлар вә яшлар хушал-хурамлиқ билән уссуллар ойнашти. Беловодский йезилиқ аяллар кеңишиниң рәиси гүлшат аблиз қизи бу хил мурасимларда яшлар өз һүнәр-маһарәтлирини көрситип, келәчәктә чоң утуқларға еришидиғанлиқлирини билдүрди. 

Кәңбулуң йезисидики уйғур аяллар җамаитиниң башчилиқида пүтүн йезидики һәр милләт хәлқи ләзәкәт һаҗим апиниң қорусида норуз мәрикиси өткүзди. Улар 20-март күни әтигәндин башлап хәтмә қуран қилип, сүмәләк пишурушқа башлиди. Сүмәләк норузниң дәсләпки бешарити болғанлиқидин бу таам үчүн буғдайни бир нәччә күн бурун үндүрмә қилиш керәк. Сүмәләк буғдийиға мәсул болған ләзәкәт һаҗим буғдайни ююп тазилап, күнгә йейип қорутуп, су қуюп туруп турғанлиқини баян қилди. У 30 кило буғдайға 90 кило ун қошуп, сүмәләк әткәнликини вә әтраптики 150 қоруға тарқатқанлиқини билдүрди. 

21-Марттики норуз байрими күни йеза җамаити тәнтәнилик мурасимни башлиди. Аяллар комитетиниң рәиси маһинур әйса баһар байрими тәнтәнилик өтүватқан билсиму, лекин уйғур дияридики вәзийәт түпәйлидин көңүллириниң йерим болуватқанлиқини изһар қилди.

Беловодский йезисиниң аяллириға охшаш, кәң булуң йезисидики аяллар кеңишиму яш-гөдәк балилар билән биллә «мәнму уйғур» паалийитигә қошулушти.

Норуз мурасимиға қатнашқан турсунай ислам хеним бу хил паалийәтләр яшларниң вәтәнпәрвәрлик роһини көтүрүштә вә шундақла яш әвладларниң уйғур хәлқиниң өрп-адәтлирини унтумаслиқида вә уни сахлап қелишида муһим рол ойнайдиғанлиқини сөзләп өтти.

Игилишимизчә, қирғизистан һөкүмәт санақлирида қирғизистандики уйғурларниң сани 60 миңға йеқин дәп қариливатқан болсиму, лекин уйғурлар қирғизистандики уйғурлар саниниң буниңдин көп икәнликини илгири сүрмәктә. Уйғурлар асасән бишкәк шәһири вә униң әтрапидики йезиларға, қарақол, җәнубтики ош, қарасу, җалалабад қатарлиқ чоң-кичик шәһәрләргә тарқалған.

Пикирләр (0)
Share
Толуқ бәт