Хитай 18‏-қурултай һарписида үрүмчидики уйғурлар топлишип олтурақлашқан районларни қаттиқ контрол астиға алди

Хитай компартийисиниң 18‏-қурултийи үрүмчидин 3 миң нәччә йүз километир йирақлиқтики бейҗиңда ечилсиму, бирақ хитай даирилири үрүмчидики уйғурлар топлишип олтурақлашқан районларни қаттиқ тәқиб астиға алған.
Мухбиримиз әркин
2012.11.07
Share on WhatsApp
Share on WhatsApp

Үрүмчилик пуқраларниң радиомизға мәлум қилишичә, илгири үрүмчиниң кочилири интайин қайнақ болсиму, бирақ йеқиндин буян қанун иҗра қилиш тармақлири, муқимлиқни қоғдиғучи хадимлар, җ х органлири вә һөкүмәт тармақлири бирлишип, үрүмчи кочилиридики яймичи, пластинка сатқучи вә коча нахшичилирини “пак-пакиз сүпүрүп ташлиған.”

Айродром, сода сарийи вә талла базарлири һәмдә мәһәллиләрдә тәкшүрүш, тәқиб қилиш күчәйтилип, өткән-кәчкән машина-аптомобилларни тәкшүрүш, права, рәсмийәтлирини сүрүштүрүш йолға қоюлған. Үрүмчидә олтурушлуқ бир хитай көчмән аһалисиниң билдүрүшичә, дөңкөврүктики чоң базарниң кириш-чиқиш ишикигә тәкшүрүш җиһазиси орунлаштурулмиған болсиму, бирақ киргән-чиққанларниң сомкиси тәкшүрүлмәктә икән.

Д у қ хитай даирилириниң қурултайни баһанә қилип, уйғур елидә тәкшүрүш вә тәқиб қилишни күчәйткәнликини тәнқид қилди. Қурултай баянатчиси дилшат ришит, даириләрниң йерим кечә яки таң сәһәрдә һечқандақ рәсмийәт беҗирмәй, нуқтилиқ уйғурларниң өйини тәкшүрүватқанлиқини билдүрүп, буниң еғир миллий кәмситиш қилмиши икәнликини билдүрди. Униң илгири сүрүшичә, 5‏-июл вәқәсидин кейин ғайиб болған уйғурларниң аилә-тавабиатлири нуқтилиқ тәқиб астиға елинған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт