' 4 - Июн ' һәрикитиниң йетәкчилиридин өркәш дөләтниң хитайға қайтиш тәлипи рәт қилинған

Өркәш әпәнди мухбирларниң зияритини қобул қилип, өзиниң бу қетим авминға бериши, җуңго һөкүмитигә елан қилинған бир қетимлиқ җәң икәнликини баян қилди. У хитай һөкүмәт даирилиригә соал қоюп,"силәр мени тутуш буйруқи чиқарған идиңлар, мана мән һазир қайтип кәлдим, қени мени қобул қилаламсиләр?"дегән.

Өркәш дөләт, хитай даирилири тәрипидин тутуш буйруқи чиқирилған, "4 - июн " тйәнәнмен оқуғучилар һәрикитиниң башламчилиридин бири болуп, әйни чағда хитай һөкүмити бу һәрикәтниң асаси тәшкиллигүчилири дәп қариған 21 кишини тутуш буйруқи чиқарған иди.

Һазир тәйвәндә турушлуқ өркәш әпәнди, 3 - июн күни хитай даирилириниң тутуш буйруқиға мақул болғандәк һаләттә, тәйвәндин хитайниң алаһидә райони болған авмин айродромиға чүшкән чағда айродромдики чегридин киришни башқурғучи даириләр тәрипидин тутулуп әкетилгән иди.

Өркәш әпәнди баянатида: хитайниң өзини чегридин киришкә йол қоймаслиқи тоғрисида тохтилип: " бу, пуқраларниң кишилик һоқуқиға һөрмәт қилиш һәққидики қануниға хилап" дәп тәнқидләш билән биргә, бундин кейин хитай һөкүмитиниң тйәнәнмен вәқәсигә болған мәсулийитини сот арқилиқ сүрүштә қилидиғанлиқини, хитай һөкүмитиниң "4 - июн қирғинчилиқи " үчүн хәлқтин кәчүрүм соришини хитап қилған.