Aqsu shehiridiki bir Uyghur bashlan'ghuch mektipide yüz bergen patiparaqchiliqta nurghun oqughuchi yarilan'ghan

 Aqsu wilayetlik hökümet weqede 41 neper oqughuchi yarilan'ghanliqini körsetken bolsimu, shinxu'a agéntliqi deslepte yarilan'ghuchilarning 100 ge yétidighanliqini xewer qilghan idi.
Shinxu'a axbaratida körsitishiche, weqe 29- noyabir shu jay waqti etigen sa'et 10 lar etrapida, aqsu shehiridiki 5- bashlan'ghuch mektepte yüz bergen.

Weqedin kéyin aqsu wilayetlik xelq hökümiti axbarat élan qilip, yarilan'ghuchilarning 41 ikenliki, bularning arisida 34 oqughuchining yénik derijide, 6 oqughuchi éghir derijide yarilan'ghanliqi, bir oqughuchining hayati xewp astida ikenlikini bildürdi.

Xitay hökümet axbaratida bérilgen weqe heqqidiki tepsilatlargha qarighanda, ikkinchi sa'etlik derstin kéyin gimnastika oynashqa chiqqan bir qisim oqughuchilar pelempeyning tutquchidin peske qarap siyrilip chüshken, netijide tutquch qayrilip kétip bir oqughuchi yerge yéqilip ketken.

Hadisidin chöchügen oqughuchilar patiparaq bolushup terep-tereptin qéchishqa bashlighan.

Shinxu'a agéntliqida deslepte peshtaq tutquchidin siyrilip chüshken oqughuchining on ikenlikini xewer qilin'ghan bolsimu, qalghan oqughuchilarning qandaq yarilan'ghanliqi tepsiliy körsitilmigen.
Yarilan'ghan oqughuchilar aqsu wilayetlik birinchi doxturxanida yataqqa élin'ghan.

Aqsu hökümet da'iriliri weqeni bir patiparaqchiliqtin kep chiqqan yarilinish hadisisi dep körsetken bolsimu, weqe tepsilatning sirtqa chiqip kétishini jiddiy qamal qilghanliqi ilgiri sürülmekte.
Xewerlerge qarighanda, aqsu hökümet da'iriliri balisi yarilan'ghan her bir a'ilige ikkidin kadir ewetip, idiyiwi xizmet ishleshke bashlighan we mektep etrapini saqchi ewetip muhasirige alghan.
Radi'omizmu bu heqte uchur igileshke köp tirishqan bolsaqmu da'iriler weqening tepsilatini yoshurdi.