Шималий корийә җәнубий корийигә тәһдит селип, уруш партлайдиғанлиқини агаһландурди

Шималий корийә җүмә күни җәнубий корийигә тәһдит селип, америка билән җәнубий корийиниң йәкшәнбә күни башлинидиған бирләшмә һәрбий маневири корийә йерим арилида уруш пәйда қилидиғанлиқини агаһландурди
Муһбиримиз әркин
2010.11.26

 Шималий корийә җәнубий корийигә тәһдит селипла қалмай, шу күни йәнә җәнубий корийиниң юнюң арилиға чегрилинидиған җайларда топчи қисимлар маневири елип барған. Маневир җәнубий корийидә турушлуқ америка армийисиниң қомандани валтер шарп юнюң арилини зиярәт қилип,  өткән сәйшәнбә күни шималий корийә топчи қисимлириниң һуҗумиға учриған җәнубий корийә һәрбий лагирини көздин кәчүрүватқан мәзгилдә елип берилған.

Шималий корийә өткән сәйшәнбә күни җәнубий корийини топқа тутқандин кейин, америка билән җәнубий корийә буниңға дәрһал инкас қайтуруп, йәкшәнбә күни сериқ деңизда бирләшмә һәрбий маневир елип баридиғанлиқини җакарлиған. Нөвәттә, америкиниң "җорҗи вашингтон "намлиқ авиаматка пилоти шәнбә күнки маневирға қатнишиш үчүн сериқ деңизға қарап илгирилимәктә.

Лекин, шималий корийә сериқ деңиздики бирләшмә һәрбий маневирни өзигә қаритилған еғир һәрбий иғвагәрчилик дәп қарап, буниң корийә йерим арилида уруш пәйда қилидиғанлиқини тәкитлигән. Шималий корийиниң һөкүмәт ахбарат оргини ‏-корийә мәркизи  ахбарат агентлиқи бу һәқтики хәвиридә "корийә йерим арили вәзийитидә уруш партлашқа қил қалғанлиқи"ни билдүрди. Бирләшмә агентлиқиниң хәвәр қилишичә, җәнубий корийидә турушлуқ америка қисимлириниң қомандани генерал валтер шарп , юнюң арилини көздин кәчүрүш җәрянида шималий корийиниң һәрикити 1953 ‏- йили имзаланған уруш тохтитиш келишимигә пүтүнләй бузғунчилиқ қилғанлиқ дәп көрсәткән. У б д т намидики җәнубий корийидә турушлуқ һәрбий қисимлар қоманданлиқ штабиниң вәқә үстидин тәкшүрүш елип баридиғанлиқи вә шундақла йәнә шималий корийиниң һуҗум қилиштин тохтишини тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.