Хитай газ турубилирини кечидә чарлаш тәдбирлирини күчәйтти

Шинхуа агентлиқиниң көрситишичә, үрүмчигә қишлиқ газ йәткүзүш хизмитиниң хәвпсизлики намида елип бериливатқан бу бихәтәрлик тәдбирлири, турпан ойманлиқидики чюдуң нефит айриш завутида бир қәдәр күчәйтилгән.

Мәлум болушичә, бихәтәрлик тәдбирлири, техника, үскүнә вә адәм күчидин пайдилинип қоғдилиш қатарларни өз ичигә алдикән.

Ашкарилинишичә, даириләр нефит қудуқлири, бөлүмләр вә хизмәт районлирида 3 - дәриҗилик қоғдилиш қурулмиси орнатқан һәмдә тиз инкас қайтуруш вә чарлаш әтрәтлирини тәшкилләп газ йәткүзүш турубилирини кечидә чарлашни йолға қойған.

Турпан - қумул нефитлики уйғур елидики әң чоң тәбиий газ вә нефит базилиридин бири болуп, чюдуң нефит айриш завути мәзкур нефитликтики асасий завуттур.

Хәвәрдә көрситишичә, нефитлик даирилири хизмәт райониниң бихәтәрликини қоғдаш үчүн лазер нурлуқ сақчиға мәлум қилиш үскүниси, көзитиш қурулмилири вә 30 данә юқири бесимлиқ чирағларни орунлаштурған.

Хитай һөкүмити ғәрбниң газини шәрққә йөткәш сияситини йолға қоюп, уйғур елидин чиқидиған тәбиий газ - нефитләрни хитай өлкилиригә йөткәп кәтмәктә иди. Мәзкур йәткүзүш турубилири утидиған шәһәрләр бир қәдәр көп болғачқа, турубиларниң бихәтәрлики мәсилиси хитайни әндишигә селип келиватқан мәсилиләрниң бир иди.