Һамид карзай, президент буш билән учрашқанда афғанистанда вәзийәтниң күндин күнгә яхшилиниватқанлиқини билдүрди

Җүмә күни ақсарайда америка президенти җорҗ буш билән учрашқан афғанистан президенти һамид карзай, афғанистанда вәзийәтниң күндин күнгә яхшилиниватқанлиқини билдүрди.
Мухбиримиз өмәр қанат
2008.09.27

Америка һөкүмитиниң афғанистанни қайтидин қуруш һәрикитигә бериватқан ярдәмлиригә рәхмәт ейтқан президент карзай, афғанистан тәрәққият саһәсидә өзи 50 яки 60 йилда басалайдиған мусапини америкиниң ярдими билән 6 - 7 йилда басти," дәп көрсәтти.

Хәвәрләргә қариғанда, америка президенти җорҗ буш вә афғанистан президенти карзай, америка һәрбий қисимлириниң һава һуҗумида бир қисим бигунаһ афған пуқралириниң өлүми нәтиҗисидә йирикләшкән икки дөләт оттурисидики мунасивәтләрни қайтидин яхшилашқа тиришмақта.

Афғанистанда талибан қалдуқлири йеқиндин бери афғанистандики америка вә шималий атлантик окян әһди тәшкилати қисимлириға қаратқан һуҗумлирини күчәйткән. Хәвәрләргә қариғанда, талибан қалдуқлири болупму, америка қисимлириниң һуҗумлирида бигуна афған пуқралириниң өлгәнликидин, йәрлик хәлқләрни афғанистан һөкүмити вә афғанистандики\чәтәл һәрбий күчлиригә қарши турушта бир тәшвиқат қорали сүпитидә пайдиланмақта.

Америка мудапиә минстири робрт гетс йеқинда бәргән баянатида, келәр әтияздин башлап афғанистанға қошумчә америка һәрбий қисимлирини әвәтишкә башлайдиғанлиқини җакарлиди. Нөвәттә афғанистан 31000 америка һәрбий қисимлири паалийәт елип бериватқан болуп, бу афғанистанда мәвҗут чәтәл һәрбий қисимлириниң %50 пирсәнтини тәшкилләйду.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.