Ürümchige qonushqa ruxset qilinmighan afghanistan ayropilanida bomba tehditi sadir bolmighan

Fransiye agéntliqining xewer qilishiche, qendihar ayrodromi memuriy ishlar mudiri nasirxan, ayropilanda bomba tehditi körülmigenliki, eksiche ayropilanning téxnikiliq kashila tüpeyli ürümchige qonushqa ruxset qilinmighanliqini bildürgen.

Xewerde neqil qilinishiche, nasirxan bu heqte toxtilip: "bomba tehditi we ayropilan bulash weqesimu sadir bolghini yoq" dégen.

Xitayning shinxu'a axbarati yekshenbe küni, kabuldin ürümchige qarap yolgha chiqqan bir yoluchilar ayropilanida bomba tehditi sadir bolghanliqi, shu tüpeyli ayropilanning ürümchide qonushigha ruxset qilinmay afghanistan'gha qayturulghanliqini xewer qilghan idi.

Bir neper "kam hawa yolliri" shirkiti wekilining fransiye agéntliqigha bildürüshiche, qaytip kelgen ayropilan qendihar ayrodromigha qon'ghan. U " bezi mesililer tüpeyli ayropilanning ürümchige qonalmighanliqi" ni bildürgen bolsimu, emme bu heqte tepsiliy toxtalmighan.

Melum bolushiche,tunji qétim yolgha chiqqan "kam hawa yolliri" shirkitige tewe bu yoluchilar ayropilani afghanistan'gha qayturup kélin'gendin kéyin, kabul ayrodromigha emes, belki qendihar ayrodromigha qon'ghan.
Xewerlerge qarighanda, bu yoluchilar ayropilani bügün yene ürümchige qarap uchqan.