Хитай һөкүмити һәрбийликтин қайтқан бир нәпәр сиясий өктичини “ағдурмичилиқ” җинайити билән қолға алди

Хитай һөкүмити һәрбийликтин қайтқан сиясий өктичиләрдин җу юйфуни һакимийәткә қарши “ағдурмичилиқ” җинайити билән әйибләп, рәсмий қолға алди.
Мухбиримиз әркин
2011.04.13
Share on WhatsApp
Share on WhatsApp

Ройтерс агентлиқиниң хәвәр қилишичә, бу хитайниң ясимән инқилабини бастуруш йолида һакимийәткә қарши “ағдурмичилиқ” қилиш җинайити билән әйибләп рәсмий қолға алған 4-киши. Җу юйфуниң бурунқи аяли җяң хаңлиниң сәйшәнбә күни ашкарилишичә, хаңҗу шәһәрлик сақчи даирилири тәптиш оргининиң җу юйфуни һакимийәткә қарши“ағдурмичилиқ” қилиш җинайити билән әйибләп, рәсмий қолға елишқа буйруғанлиқини билдүргән.

Кишилик һоқуқ тәшкилатлириниң илгири сүрүшичә, һакимийәткә қарши “ағдурмичилиқ” җинайити, хитай компартийә һөкүмитиниң демократик ислаһат елип беришни оттуриға қойған хитай сиясий өктичилирини вә яки уйғурларниң һоқуқиға һөрмәт қилишни тәләп қилған тинчлиқпәрвәр уйғур паалийәтчилирини бастуридиған қорал болуп қалған. Җу юйфу 3‏-айниң 5‏-күни тутқун қилинған иди.

Җяң хаңли, җу юйфуниң тутқун қилиништин 20 күн бурун сақчилар тәрипидин тәқиб астиға елинғанлиқини вә шу сәвәблик униң сиясий паалийәткә қатнишиш пурсити йоқлуқини билдүргән.

Җу юйфуниң рәсмий қолға елинип, һакимийәткә қарши “ағдурмичилиқ” җинайити билән әйиблинишини кәлтүрүп чиқарған конкрет сәвәб мәлум әмәс.
Лекин, җу юйфуниң бир йеқин ағинисиниң ройтерс агентлиқиға билдүрүшичә, униң қолға елиниши торда шеир елан қилип, кишиләрни намайиш қилишқа чақирғанлиқ билән мунасивәтлик болуши мумкин.

Бу вәқә хитай өктичиси вә мәшһур сәнәтчи әй вейвейниң тутқун қилинип, иқтисади җинайәт билән әйиблиниши вә һазирға қәдәр из-дерикиниң йоқлуқи хәлқара җәмийәтниң диққитини қозғиған бир мәзгилдә йүз бәргән иди. Шу сәвәблик бу хәлқара ахбарат васитилириниң диққитини қозғиған йәнә бир мәсилә болуп қалди.

Җу юйфу 1999‏-йили җуңго демократийә партийисиниң қурулушида актип рол ойниғанлиқ сәвәблик бир қетим қолға елинип, 7 йил түрмидә ятқан иди. Бу қетим униң 2‏-қетим қолға елинишидур.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.