Uyghur élidiki alahide saqchi qisimlirining tuyuqsiz heriketlerge “Del waqtida we qattiq zerbe bérish” iqtidarini ashurushi telep qilindi

Xitay da'iriliri Uyghur élidiki qoralliq alahide saqchi qisimlirining tuyuqsiz weqelerni bir terep qilish iqtidarini ashurushini telep qildi.
Muxbirimiz irade
2012.02.23
Share on WhatsApp
Share on WhatsApp

Shinxu'a agéntliqidin bérilgen xewerdin melum bolushiche, 21-féwral küni Uyghur éli miqyasi boyiche wezipe ötewatqan alahide saqchi qisimlarning kéyinki 3 yilliq xizmetlirini orunlashturush xizmet yighini chaqirilghan. Yighinda Uyghur rayonluq partkom da'imiy ezasi shung shu'en'go söz qilip, alahide saqchi qisimlirini Uyghur élide yüz bergen herqandaq tuyuqsiz weqege del waqtida we qattiq zerbe bérip muqimliqqa kapaletlik qilishqa, térrorluqqa qarshi küresh qilish üchün alahide jeng qilish iqtidarini yétildürüshke chaqirghan.

Da'iriler 2005-yilidin bashlap, qoralliq alahide saqchi qisimlirini küchlendürgen bolup, ular Uyghurlarning hökümetke naraziliq bildürüp qilghan herqandaq herikitini “Tuyuqsiz weqe, térrorluq pa'aliyet” dégen nam astida basturulup kelmekte. 2011-Yilining axirida xoten mokuyla yézisida ayallar we balilarnimu öz ichige alghan bir guruppa kishi chégradin qachmaqchi bolghanda edliye organlirining su'al-soriqisizla saqchilarning qoralliq hujum qilishigha uchrap éghir ölüm-yétim weqesi körülgen idi. Közetküchiler, shung shun'goning tuyuqsiz weqelerge “Del waqtida we qattiq zerbe bérish” chaqiriqini yuqiriqidek sotsiz ölüm weqelirining bundin kéyinmu yüz béridighanliqining ispati, dep qarimaqta.

Gerche xelq'ara kishilik hoquq organliri xitay hökümitini Uyghur élidiki qoralliq basturush heriketlirini ayaghlashturushqa chaqiriwatqan bolsimu, emma Uyghur éli da'iriliri dawamliq halda Uyghur élidiki herqaysi derijilik qoralliq qisim, chégra mudapi'e qisim, alahide saqchilar sanini köpeytishni we ularning hoquq da'irilirini kéngeytishni dawam qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.