Albaniye jasusluq orgini xitayni albaniyidiki Uyghurlargha da'ir uchurlar bilen teminlep turghan

Amérika mexpiy diplomatiye höjjetlirini élan qilip nam chiqarghan wikiliks torining ashkarilishiche, albaniye jasusluq orgini albaniyidiki Uyghurlarning pa'aliyitidin xitayni xewerdar qilip turghan.

Wikiliks yéqinda  béyjingdiki amérika elchixanisining amérika dölet ishlar ministirliqigha yollighan mexpiy höjjitini ashkarilighan.

Amérika elchixanisining höjjitide albaniye jasusluq orginining güentanamodin barghan Uyghurlarni tingtinglap, xitaygha uchur yetküzgenliki ilgiri sürülgen.

Amérika elchixanisining 2008‏-yili 10-awghust, dep chésla qoyulghan mexpiy höjjitide yene, albaniye jasusluq orginining béyjing olimpik musabiqisi jeryanida yüz bergen  bezi weqelerge da'ir uchurlardin waqip bolghanliqi, albaniye jasusluq orginining 2008‏-yili 6‏-awghusttiki melumatida, 4‏-awghust küni qeshqerde xitay saqchilirigha hujum qilish weqesige chétilip qolgha élin'ghan ikki Uyghurning sh t i p bilen alaqisi yoqluqi ilgiri sürülgenliki xatirilitilgen.

Amérika diplomatiye höjjitide eskertip, albaniye terepning melumatida bu uchurni ular yéqin munasiwet qilidighan bir Uyghurdin alghanliqi, bu Uyghurning yene “Bu türlük weqeler olimpik musabiqisi axirlashquche xitayda yene yüz béridighanliqi” ni  bildürgenliki bayan qilghanliqini tekitligen.

Közetküchiler, amérika güentanamodiki Uyghurlarni xitaygha qayturup bérishni ret qilip, ulardin 5 kishini 2005‏-yili albaniyige orunlashturghan idi.