Xitay amérikini kishilik hoquq söhbiti harpisida ichki ishlargha arilashmasliqqa agahlandurdi

Amérika-xitay kishilik hoquq söhbiti ete yeni charshenbe küni bashlanmaqchi. Bügün xitay tashqi ishlar bayanatchisi xung léy bu heqte ipade bildürüp, amérikini söhbet dawamida kishilik hoquq mesilisini bahane qilip xitayning ichki ishlirigha arilishiwalmasliqqa aldin'ala agahlandurdi.
Muxbirimiz shöhret hoshur
2011.04.26

Xitay bayanatchi amérika bilen xitay arisida kishilik hoquq mesiliside oxshimighan qarash mewjutluqini, tereplerning öz- ara hörmet we barawerlik asasida bir-birini öz -ara chüshinishni ilgiri sürüshi kéreklikini bildürdi.

 Charshenbe küni bashlinidighan kishilik hoquq söhbiti ikki kün dawam qilidu. Söhbetke amérika tereptin amérika tashqi ishlar ministirliqining démokratiye we insan heqlirige mes'ul mu'awin tashqi ishlar ministiri micha'el posner bashchiliqidiki bir guruppa ishtirak qilidu.

Xewerlerde amérika terepning bu qétim xitayning insan heqliri weziyitidiki bir qisim muhim we nazuk mesililerni otturigha qoyidighanliqi, qanunsiz tutqun qilin'ghan kishilik hoquq pa'aliyetchiliri, öktichiler we insan heqliri adwokatlirini qoyup bérishni jiddiy shekilde telep qilidighanliqi bildürülmekte.

Xitay bayanatchi bügünki axbarat yighinida muxbirlarning xitay öktichi sen'etkar ey wéywéy heqqiki so'allirigha jawab bérip, “Biz bashqa döletlerning bizge düshmenlik pozitsiyisi tutushidin endishe qilmaymiz؛ biz peqet bashqa döletlerning we u dölettiki xelqlerning qanun organlirimizning ey wéywéy heqqidiki tekshürüshi tamamlan'ghuche sewr qilip turushini ümid qilimiz” dédi.

Amérika tashqi ishlar ministiri hillariy klinton mushu ayning béshida, xitaydiki insan heqliri weziyitidiki yamanlishish weziyitidin endishe qiliwatqanliqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.