Amérika awi'amatkisi jenubiy koriye bilen birlikte sériq déngizdiki manéwirgha qatnashmaqchi

Amérikining bir emeldari , amérika bilen jenubiy koriye birlikte ötküzmekchi bolghan herbiy manéwirgha amérika awi'amatkisiningmu qatnishidighanliqini bildürgen.
Muxbirimiz mihriban
2010.11.24
Share on WhatsApp
Share on WhatsApp

En'gliye b b s agéntliqining xewer qilishiche, amérikining bir emeldari, amérika bilen jenubiy koriye birlikte ötküzmekchi bolghan 4 künlük herbiy manéwirgha amérika awi'amatkisiningmu qatnishidighanliqini bildürgen.

 Xewerde déyilishiche, amérikining jenubiy koriyide turushluq herbiy qismi bayanat bérip, "jorji washin'gton " namliq awi'amatkining 28-noyabirdin 1-dékabirghiche sériq déngizda élip bérilidighan amérika, jenubiy koriye birleshme manéwirigha qatnishidighanliqini bildürgen.

Jenubiy koriye dölet mudapi'e qisimliri bu qétimliq maniwér heqqide izahat bérip, bu qétimqi herbiy manéwirning meqsiti shimali koriyige agahlandurush bérish ikenlikini bildürgen. Xitay hökümiti üzlüksiz halda amérika awi'amatkisining jenubiy koriye bilen amérika sériq déngizda ötküzmekchi bolghan birleshme manéwirigha qatnishishigha naraziliq bildürüp kéliwatqan idi.

Bu yil 5- ayda jenubiy koriyining tyen'en namliq herbiy paraxoti shimali koriye teripidin déngizgha chöktürüwétilgendin buyan, jenubiy koriye bilen amérika bir yürüsh herbiy manéwirlarni élip barghan. Xitay hökümitining qattiq naraziliqi sewebidin bu yil 7- ayning axiri jenubiy déngizda ötküzülmekchi bolghan bir qétimliq herbiy manéwir yapon déngizida ötküzülgen.

Amérika aqsaray bayanatchisining bildürüshiche, amérika prézidénti obama seyshenbe küni jenubiy koriye prézidénti li mingbogha téléfon qilip, ikki terepning birleshme manéwir ötküzüshte birlikke kelgenlikini hem koriye yérim arili mesiliside amérikining " jenubiy koriye bilen mürini ‏- mürige tirep bir septe turidighanliqi " ni bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.