Хитай америкиниң атақлиқ нахша чолпини боб диланниң хитайда оюн қоюшиға рухсәт бәрмиди

Америка атақлиқ нахша чолпини, 68 яшлиқ боб диланниң бейҗиң, шаңхәй қатарлиқ шәһәрләрдә оюн қоюш пилани хитай мәдәнийәт министирлики тәрипидин рәт қилинишқа учриғандин кейин мәзкур музикант өзиниң шәрқий җәнубий асияға қаратқан оюн қоюш пиланини әмәлдин қалдурған.
Мухбиримиз үмүдвар
2010.04.04

"Күндилик телеграф"ниң хәвәр қилишичә, боб дилан йәнә хоңкоң, тәйвән қатарлиқ җайлардиму оюн қоймақчи болған.

Боб диланниң хитайда нахша ейтиш пиланиниң рәт қилишқа учриши хәлқара мәтбуатларниң диққитини җәлп қилған болуп, буниңдин икки йил илгири хитай, исландийә чолпини бийорк шаңхәйдә нахша ейтиш җәрянида тибәтни қоллайдиған шоар товлиғандин кейин ғәрб сәнәткарлириниң хитайда оюн қоюшиға нисбәтән сәзгүрлишип кәткән.

Мәтбуатларниң йезишичә, америка чолпини боб диланниң 60 - йилларда иҗад қилған бир қанчә нахшилирида кишилик һоқуқ вә урушқа қарши туруш идийилири әкис әттүрүлгән болуп, мәзкур нахшилар таки һазирғичә ейтилмақта. Боб диланниң иҗадийәтлиридә бу хил кишилик һоқуқ, урушқа қарши туруш, инсанпәрвәрлик идийилириниң әкис етиши хитайни әндишиләндүргән болуши мумкин.

Йеқинқи вақитлардин буян америка билән хитай арисида гогул интернет ширкити мәсилисини чөридигән һалда мәтбуат - сөз әркинлики, америкиниң тәйвәнгә қорал сетип бериши, президент обаманиң далай ламани қобул қилиши һәмдә икки тәрәп сода мунасивәтлири вә хәлқ пулиниң алмаштуруш қиммити мәсилисини өз ичигә алған бир қатар мәсилиләрдә ихтилаплар күчәйгән иди.

Мунасивәтлик хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.