Америка өзбекистанда һәрбий база қурмайду

Пәрғанә агентлиқиниң хәвәр тарқитишичә, америка президентиниң афғанистан вә пакистан ишлири бойичә алаһидә вәкили ричард холбрук өзиниң мәркизий вә җәнубий асиядики афғанистан, пакистан, өзбекистан, қирғизистан, таҗикистан һәмдә қазақистанға қаратқан зиярити җәрянида, қазақистан пайтәхти астанаға йетип кәлгәндә америкиниң өзбекистанда һәрбий база қурушни пилан қилмайватқанлиқини билдүрди.
Мухбиримиз үмидвар
2010-02-21
Share

"Өзбекистан бизниң афғанистанға йүк тошуш үчүн өтүшимизгә наһайити қиммәтлик ярдәм бериватиду, бирақ бу йәрдә база қурулмайду" дәйду холбрук. Униң бу сөзи, у қазақистан ташқи ишлар министири қанат савдабайев билән көрүшкәндин кейин қазақистан хәвәрләр агентлиқи тәрипидин елан қилинған.
 
Холбрук йәнә, "қирғизистандики манас базисида бизниң муһим йәткүзүш мәркизимиз бар. Бу мәркәз афғанистандин йүк тошуш вә афғанистанға йүк йәткүзүш ишини қилиду, биз бишкәкниң бу җәһәттики ярдимидин наһайити рази" дәйду.

Әслидә 2001 - йили талибанларға қарши уруш башланғандин кейин америка өзбекистандики қарши - хан абадта һәрбий база қурған һәмдә бу җайға миңдин ошуқ һәрбий хадим вә һәр хил айрупиланлирини орунлаштурған иди. Бирақ, 2005 - йилидики әнҗан вәқәсидин кейин, вашнгтонниң ташкәнтни тәнқид қилишиға әгишип, ташкәнтниң москва вә бейҗиң билән болған мунасивәтлири қоюқлишип, нәтиҗидә, өзбекистанниң тәлипи бойичә америка базиси тақалған иди. Бирақ, йеқинқи вақитлардин буян америкиниң өзбекистанда қайта һәрбий база қуруши һәққидә һәр хил сөзләр тарқалған.
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт