Amérika özbékistanda herbiy baza qurmaydu

"Özbékistan bizning afghanistan'gha yük toshush üchün ötüshimizge nahayiti qimmetlik yardem bériwatidu, biraq bu yerde baza qurulmaydu" deydu xolbruk. Uning bu sözi, u qazaqistan tashqi ishlar ministiri qanat sawdabayéw bilen körüshkendin kéyin qazaqistan xewerler agéntliqi teripidin élan qilin'ghan.
 
Xolbruk yene, "qirghizistandiki manas bazisida bizning muhim yetküzüsh merkizimiz bar. Bu merkez afghanistandin yük toshush we afghanistan'gha yük yetküzüsh ishini qilidu, biz bishkekning bu jehettiki yardimidin nahayiti razi" deydu.

Eslide 2001 - yili talibanlargha qarshi urush bashlan'ghandin kéyin amérika özbékistandiki qarshi - xan abadta herbiy baza qurghan hemde bu jaygha mingdin oshuq herbiy xadim we her xil ayrupilanlirini orunlashturghan idi. Biraq, 2005 - yilidiki enjan weqesidin kéyin, washn'gtonning tashkentni tenqid qilishigha egiship, tashkentning moskwa we béyjing bilen bolghan munasiwetliri qoyuqliship, netijide, özbékistanning telipi boyiche amérika bazisi taqalghan idi. Biraq, yéqinqi waqitlardin buyan amérikining özbékistanda qayta herbiy baza qurushi heqqide her xil sözler tarqalghan.