Вашингтондики сотта уйғур тутқунларниң америкидин панаһлиқ тиләш һоқуқи барлиқи илгири сүрүлди

Бүгүн вашингтонда гуантанамода қамалған уйғур тутқунларни америкиға қоюп бериш һөкүмини күчкә игә қилиш яки ағдуруп ташлаш үстидә елип берилған сотта, америка һөкүмәт вакаләтчилири билән уйғур тутқунларниң адвокатлири арисида муназириләр елип берилған болсиму, лекин уйғур тутқунлар мәсилиси үстидин ениқ қарар елинмиди.
Мухбиримиз җүмә
2008.11.24

Америка һөкүмити вакаләтчилири сотчи урбина әпәндиниң уйғур тутқунларни америкиға қоюветиш һөкүми мәзкур сотчиниң һоқуқ даирисидин һалқип кәткән буйруқ дәп көрсәтти вә бу уйғурларни америкиға елип келишкә болмайдиғанлиқини, нөвәттә америка һөкүмитиниң бу уйғурларни алидиған башқа бир дөләт тепишқа тиришчанлиқ көрситиватқанлиқини тәкитләшти.

Әмма, уйғур тутқунларниң баш адвокати сейбин вилләт әпәнди, гунаһсизлиқи испатланған уйғур тутқунларниң, һөкүмәт уларни башқа йәрләргә орунлаштурғичә болған җәряндиму йәнә түрмигә муптила қилинмаслиқи лазимлиқини оттуриға қойди.

Сейбин вилләт йәнә, америка әрзийәт соти сотчилиридин, сотчи урбинаниң һөкүмини күчкә игә қилип уйғур тутқунларни америкиға қоюп беришкә үндиди.

7 - Өктәбир америка федератсийә сотида, сотчиси ричардо урбина гуантанамодики уйғур тутқунларниң америкиға қоюп берилиши керәкликини буйриған болсиму, әмма америка һөкүмити америка әрзийәт сотиға мәзкур қарар устидин әрз сунуп сотчи урбинаниң һөкүмини бикар қилишқа урунған иди.

Гәрчә бу нөвәтлик сотта сотчи урбинаниң һөкүмини күчә игә қилиш вә яки ағдуруп ташлаш һәққидә ениқ бир қарар елинмиған болсиму, лекин бу нөвәтлик сотта уйғур тутқунларниң гуантанамода туруп америкидин панаһлиқ тиләш һоқуқи барлиқи илгири сүрүлди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.