Америка - русийә истратегийилик ядро қоралларни қисқартиш шәртнамиси пат йеқинда прагада имзалиниду

Америка билән русийә истратегийилик ядро қоралларни қисқартиш мәсилисидә асасән келишим һасил қилған болуп, хәвәрләрдә америка президенти обама билән русийә президенти медвидевниң алдимиздики икки һәптә ичидә прагада учришип, истратегийилик ядро қоралларни қисқартиш тоғрисидики йеңи шәртнамиға имза қойидиғанлиқини билдүрүлди.
Мухбиримиз әркин
2010.03.25

Бирләшмә агентлиқиниң бу һәқтики хәвиридә, бу шәртнамә йәр шаридики ядро тәһдитини азайтип, америка билән русийә арисида өз - ара ишәнч вә һәмкарлиқни күчәйтиш йолидики муһим бир қәдәм һесаблинидиғанлиқини илгири сүргән. Ақсарай президент обама билән русийә президент медвидевниң мушу бир қанчә күн ичидә телефонда сөзлишип, ядро қораллар шәртнамисиниң ахирқи нусхиси үстидә сөһбәтлишидиғанлиқини билдүрди.

Йеңи шәртнамә икки дөләт арисида 1991 - йили имзаланған истратегийилик ядро қораллирини қисқартиш шәртнамисиниң орниға дәсситилиду. 1991 - Йили имзаланған мәзкур шәртнаминиң муддити бу йил 12 - айда тошатти. Бу шәртнамида русийә билән америкидин истратегийилик ядро оқ бешиниң санини 1700 билән 2200 арисида сақлап қелиш тәләп қилинған. Йеңи шәртнаминиң мәзмуни елан қилинмиған болсиму, лекин хәвәрләрдә, йеңи шәртнамидә икки тәрәпниң ядро оқ бешини 1500 әтрапиға чүшүрүш тәләп қилинидиғанлиқи илгири сүрүлгән.

Анализчилар, бу шәртнамә президент обаманиң 2009 - йили 4 - айда дуняни ядро қораллиридин хали қилиш тоғрисидики чақириқиниң роһиға уйғун келидиғанлиқини билдүрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.