Америкида президент сайлими өткүзүлди

Бу күн пүтүн америка бойичә президент сайлими болуп, аваз бериш салаһийитигә игә америка пуқралири өзлири халиған президент намзатлириға беләт ташлиди.

Демократлардин келип чиққан барак обама билән җумһурийәтчиләрдин келип чиққан мит ромней вә һәр қайси штатларниң дөләт мәҗлисниң авам палата вә кеңәш палатаға сайлинидиған намзатлири сайлам белитидин орун алған.

Инкаслардин мәлум болушичә, бу америкиниң йеқинқи тарихидики әң юқири риқабәтлик президент сайлими болуп һесаблинидикән. Президент обама өзиму чикаго шәһиридә сайламға қатнишип беләт ташлиған. Ромней болса масачустес штатида беләт ташлиған.

6-Ноябир күнидики пүтүн мәмликәт миқясидики президент сайлими әтигәндә башланған болуп, шәрқий қирғақтики вирҗинийә қатарлиқ җайларда әтигән саәт 6 дә башланған.

Бу қетимқи президент сайлимиға хели көп санда уйғур америка пуқралириму қатнашқан болуп, бу сайлам америка пуқралиққа өткән уйғурларниң саниниң хели көрүнәрлик дәриҗидә ашқан пәйтигә тоғра кәлгәнлики үчүн вирҗинийә, калифорнийә вә ню-йорк һәм башқа җайлардики пуқра уйғурлар мәзкур әркин сайламға қатнишип, өзлири халиған намзатқа беләт ташлиди.

Сайламда кимниң утуп чиққанлиқи бүгүн ахшам мәлум болиду.