Америка һәрбий даирилири тинч окян районида чоң типтики һәрбий маневир башлиди

Бу нөвәтлик маневир "алтун көзәйнәклик йилан 2010" дәп аталған. Бу хилдики маневир бу йил 29 - йилиға қәдәм қойған болуп, маневир 1 - феврал әтигәндә тайландниң раюң өлкисидә башланди.

Франсийә агентлиқиниң көрситишичә, бу нөвәтлик маневирға америка, японийә, тайланд, сингапор, һиндонезийә вә җәнубий корийә қатарлиқ дөләтләрдин кәлгән җәмий 14 миң 73 нәпәр әскирий хадим қатнашқан. Мәлум болушичә, бу җәнубий корийиниң мәзкур маневирға тунҗи қетим қатнишиши икән.

Хәвәрдә нәқил қилишичә, тайландта турушлуқ америка баш әлчиси әрк җон, мәзкур маневирниң юқириқи дөләт армийилириниң инсаний ярдәм вә апәттин қутқузуш вәзипилиригә мас һалда инкас қайтуруш қәдимини тизлитидиғанлиқини илгири сүргән вә мәзкур маневирни америкиниң тинч окян райони һәмдә асиядики әң чоң һәрбий маневири дәп көрсәткән.

Мәлум болушичә, маневирға америка 8 миң 741 нәпәр, тайланд 4 миң 985 нәпәр, сингапор 140 нәпәр, японийә 108 нәпәр вә һиндонезийә 95 нәпәр әскәр қатнаштурған.

Униңдин башқа йәнә 20 дин артуқ дөләт көзәтчи сүпитидә қатнашқан. Маневир 1 - февралдин 11 - февралғичә давамлишидикән.