Америка тәйвәнгә сетип берилидиған қоралларниң түрини көпәйтидиғанлиқини билдүрди

Америка һөкүмити пәйшәнбә күни тәйвәнгә сетип берилидиған қорал - ярақларниң түрини көпәйтишкә йешил чирағ йеқип, тәйвәнгә техиму көпләп қорал - ярақ сетип беридиғанлиқиниң бешаритини бәрди.
Мухбиримиз әркин
2010-03-19
Елхәт
Пикир
Share
Принт

Америка ташқи ишлар министирлиқиниң шәрқий асия ишлири муавин ярдәмчи министири дәйвид шер, америка дөләт мәҗлисидики испат бериш йиғинида америкиниң тәйвән мәсилисидики позитсийисини тәкитләп, америка тәйвәнниң өзини мудапиә қилишиға керәклик қораллар билән тәминләш "мәҗбурийитини үзлүксиз ада қилидиғанлиқи"ни билдүргән.

Дәйвид шер, дөләт мәҗлисиниң америка - хитай иқтисади бихәтәрлик көзитиш комитетида испат берип, "хитай чоң қуруқлуқи билән бирлишиш тоғрисидики бесим вә тәһдиткә тақабил туралайдиған әмили күчкә игә икәнликидин хатирҗәм болуши керәк" дегән. Тәйвән президенти ма йиңҗу, бир тәрәптин хитай билән мунасивәтни юмшитишқа тиришса, йәнә бир тәрәптин қорал - ярақ сетивелишни тезлитип, америкиниң тәйвәнгә F_16 уруш айропиланлирини сетип беришни тәләп қилған иди.

Америка дөләт мудапиә министирлиқиниң шәрқий асия ишлири муавин ярдәмчи министири майкел шифир испат бериш йиғинида сөз қилип, хитайниң нөвәттики һәрбий һазирлиқиниң нишани мәркәзлик тәйвән боғузида йүз бериш еһтимали болған һәрбий тоқунушқа қаритилғанлиқини илгири сүргән. Америка йеқинда тәйвәнгә 4.6 Милярд долларлиқ қорал - ярақ сетип беришни мақуллап, хитайниң наразилиқини қозғиған иди. Хитай һөкүмити қорал - ярақ содисини баһанә қилип, америка билән болған һәрбий алақини тоңлатқан.
Толуқ бәт