Америка билән вейтнам бирләшмә һәрбий маневир өткүзмәкчи

Америка билән вйетнам йеқинда бирләшмә һәрбий маневир елип бармақчи. Игилинишичә, бу һәрбий маневир вейтнам билән хитай арисида игилик һоқуқ мәсилиси мәвҗут болған җәнубий җуңго деңизиниң оттура қисимлирида елип берилидикән.
Мухбиримиз ирадә
2010.08.10

Б б с ниң хәвәр қилишичә, көзәткүчиләр бу һәрбий маневирниң хитайни қаттиқ биарам қилидиғанлиқини илгири сүрмәктә. Чүнки җәнубий җоңгу деңизидики аралларниң тәвәлик мәсилиси хитай билән вейтнам арисида узундин бери һәл болмай келиватқан болуп, униң үстигә хитай бу мәсилигә һәрқандақ бир дөләтниң арилишишиға қәтий қарши туруп кәлгән иди. Шуңа көзәткүчиләр хитайниң америка билән вейтнамниң җәнубий җуңго деңиз тәвәсидә маневир өткүзүшини шүбһисизки "иғвагәрчилик" дәп қарайдиғанлиқини билдүрүшмәктә.

Бу қетимлиқ һәрбий маневирға америкиниң техи йеқиндила америка  - корийә һәрбий маневириға қатнишип қайтқан 7 - флоти вә ядро күчи билән һәрикәтлинидиған "җорҗ вашингтон" намлиқ авиаматкисиму қатнишидикән.

Гәрчә 7 - филот бу маневир һәққидә баянат елан қилип, маневирни америка билән вейтнамниң дипломатик мунасивәт орнатқанлиқиниң 15 йиллиқи мунасивити билән елип берилидиған "бир қатар деңиз үсти һәрбий мәшиқи" дәп атиған болсиму, әмма көзәткүчиләр буниң хитайға берилгән бир қетимлиқ сигнал икәнликини илгири сүрүшмәктә.

Б б с ниң ейтишичә, бу қетимлиқ һәрбий маневир арқилиқ америка өзиниң районда һелиһәм контрол қилиш күчигә игә икәнликини вә бу районда әркин һәрикәт қилиш үчүн хитай билән тиркишиштин янмайдиғанлиқини көрситишни мәқсәт қилған икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.