Америкида хитайниң техника җасуслуқиға аит вәқәләр ашкариланди

Чаршәнбә күни шималий калифорнийә сот даирилири дава ечип, хитайниң дөләт игиликидики ширкити болған “пәнгаң гуруһи” вә пәнгаң гуруһи тармиқидики үч ширкәтни иқтисад вә техника җасуслуқи билән әйиблиди.
Мухбиримиз ирадә
2012.02.09

Әйибнамидә ейтилишичә, мәркизи сичүәндә турушлуқ пәнгаң ширкити калифорнийидики қаналлири арқилиқ америкиниң даңлиқ химийилик мәһсулатлар ширкити “дупонт” ниң бир қанчә муһим техникисини оғрилиған.

Буниңдин сирт, чаршәнбә күни чикаго сот даирилири хитайға четишлиқ йәнә бир техника җасуслуқ делосини ашкарилиди. Америка пуқраси болған хән җүәнҗин әсли моторола ширкитиниң енжинири болуп, у 2007-йили моторола ширкитиниң сода мәхпийәтликлиригә аит бир чамдан һөҗҗәт билән кетиватқанда чикаго айродромида қолға чүшкән.

Америка сот даирилири чаршәнбә күни униң “сода мәхпийәтликлирини оғрилаш җинайити” ни бекиткән. Әмма униң үстидики “америкиға қарши иқтисадий җинайәт өткүзүш” дәйдиған әйибнамә ағдурулған. Сот даирилири “хән җүәнҗинниң бу һәрикити моторола ширкитигә хаинлиқ қилиш болсиму, әмма буниңдин хән җәнҗүн өзи пуқралиқиға өткән иккинчи вәтини америкиға хаинлиқ қилди, дегән мәнини чиқарғили болмайду” дегән. Игилинишичә, хәнниң җинайити һәққидики ахирқи қарар 4-айда елан қилинидикән.

Юқиридики хитайға четишлиқ техника җасуслуқ вәқәлири хитай муавин рәиси ши җинпиңниң америка зиярити башлиништин аввал ашкариланди. Һазир көзәткүчиләр, икки дөләт оттурисидики учришишларға қизиқмақта, бүгүн ши җинпиң америка муавин президенти җо байдинға телефон қилип, америка билән яхши мунасивәтни сақлап қалидиғанлиқиниң сегналини бәргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.