خىتاي ھۆكۈمىتىنىڭ خەلق پۇلى قىممىتىنى يۇقىرى كۆتۈرۈشنى ئۈزلۈكسىز رەت قىلىپ كېلىۋاتقانلىقى سەۋەبلىك، ئامېرىكا بىلەن خىتاي ئوتتۇرىسىدىكى سودا مۇناسىۋىتىدە ئامېرىكا ئىزچىل زىيان تارتىپ كېلىۋاتقان ئىدى.
بۇ مەسىلىگە قارىتا، ئامېرىكا دۆلەت مەجلىسى ئەزالىرى ئۆتكەن ھەپتە خىتاينى خەلق پۇلىنىڭ قىممىتىنى ئۆستۈرۈشكە مەجبۇرلاش كېرەكلىكى ھەققىدە تەكلىپ لايىھىسى سۇنغان ھەم بۇ قارارنى 11-ئۆكتەبىر سەيشەنبە كۈنى دۆلەت مەجلىسىدە ئاۋازغا قويۇش بېكىتىلگەن ئىدى.
خىتاي ھۆكۈمىتى بۇ قارار لايىھىسىگە نارازىلىقىنى بىلدۈرۈپ، بۇ خىتاي ماللىرىغا قارىتا جازا قوللىنىش دەپ ئەيىبلىگەن ئىدى. ئامېرىكا پرېزىدېنتى باراك ئوباما بولسا، خىتاي ھۆكۈمىتىنىڭ خەلق پۇلى قىممىتىنى ئۆستۈرۈشكە قارشى تۇرۇۋاتقانلىقىنى ئەيىبلەپ كېلىۋاتقان بولسىمۇ، ئەمما ئامېرىكا دۆلەت مەجلىسى ئەزالىرى ئوتتۇرىغا قويغان بۇ تەكلىپ لايىھىسىگە قارىتا قوللاش پوزىتسىيىسىدىمۇ بولمىغان ئىدى.