Америка малийә министири хитайға хәлқ пули мәсилисидә бесим ишлитидиғанлиқини билдүрди

Америка малийә министирликиниң министири тимотий гейтенер "хитайниң пул қиммитиниң өсүш сүрити интайин аста, пәрқ интайин кичик" деди. У бу сөзләрни 16 - сентәбир күни америка дөләт мәҗлисидики испат бериш йиғинида қилған болуп, у, хитайниң хәлқ пулиниң қиммитиниң өсүш сүрити интайин аста болғанлиқтин, өзиниң хитай һөкүмитини хәлқ пулиниң қиммитини ашурушқа мәҗбурлайдиған тәдбирләр үстидә ойлиниватқанлиқини билдүргән.
Мухбиримиз ирадә
2010.09.16

У, "биз хитай билән тиҗарәт қиливатқан башқа дөләтләргә охшашла хитай хәлқ пули қиммитиниң өзгәрмәй туруверишидин әнсиримәктимиз" дегән вә хәлқарадики башқа чоң дөләтләр билән бирликтә хитайға бесим ишлитидиғанлиқини билдүргән.

Бирләшмә агентлиқиниң хәвәр қилишичә, гейтенер бу йил 11 - айда җәнубий корийидә елип берилидиған 20 дөләт рәһбәрлири учришишида америка вә униң сода шериклириниң хитайға хәлқ пули қиммитини өстүрүш һәққидә бесим ишлитидиғанлиқини билдүргән.

Мәлум болушичә, бу йил 6 - айда хитай даирилири хәлқ пулиниң қиммитини аста - аста тәңшәйдиғанлиқи һәққидә вәдә бәргән, әмма аридин бир қанчә күн өткәндин кейинла хәлқ пули қиммитини муқим тутушни қайта тәкитлигән иди.

Б б с ниң хәвәр қилишичә, америка малийә министириниң бу қетимлиқ позитсийиси илгирикигә қариғанда бир қәдәр қаттиқ болуп, бу америка һөкүмитиниң хитайниң хәлқ пули мәсилисигә җиддий қараватқанлиқини көрситип беридикән.
 
Хитай ташқи ишлар баянатчиси бүгүнки мухбирларни күтүвелиш йиғинида америка малийә министириниң сөзигә қарита инкас қайтуруп, "хитайға бесим ишлитиш мәсилини һәл қилиш түгүл, техиму мурәккәпләштүрүветиду", деди.

 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.