Amérika kéngesh palatasining bir qisim ezaliri amérika soda ministirini xitayning pul siyasitige qarshi tedbir élishqa chaqirdi

Kéngesh palata ezalirining xétide, "xitayning pul-mu'amile bazirigha ariliship we xelq pulining kursini körünerlik chüshürüp, xitay éksport tawarlirigha qoshumche yardem bériwatqanliqida shübhe yoqtur" dep tekitlen'gen. Amérika dölet mejlis ezaliri we karxanilirining shikayet qilishiche, xitay xelq pulining kursini 40% chüshürüp, sodida adaletsiz riqabet üstünlükige érishiwatidu.

Prézidént obama 2008 ‏- yili saylam jeryanida xitayni xelq pulining kursini chüshürüp, sodida adaletsiz payda tépish bilen eyibligen. Lékin u saylamda ghelibe qilip, hakimiyet sorighandin kéyin xitayni pul kursini kontrol qilidighan döletler tizimlikige kirgüzüshni ikki qétim ret qildi.

Béyjing hökümiti bolsa, amérika - xitay sodisidiki amérikining passip balansini xelq pulining qimmiti keltürüp chiqiriwatqanliqini ret qilip, eger amérika tedbir qollansa buninggha küchlük inkas qayturudighanliqini agahlandurup kelgen. Kéngesh palata ezalirining lu jyaxuygha yazghan xétide yene, amérika soda qanunigha asasen, xitayning xelq puli siyasitini éksport tawarlirigha qoshumche yardem bergenlik dep tonushni telep qilghan.