سۆھبەتكە قاتناشقان تەرەپلەر دۈشەنبە كۈنى ئاخبارات ۋاستىلىرىگە بايانات بېرىپ، ئامېرىكا - خىتاي مۇناسىۋىتىدىكى جىددىيچىلىكنى يۇمشىتىشنىڭ ئەھمىيىتىنى تەكىتلىگەن. خىتاي تاشقى ئىشلار مىنىستىرى ياڭ جيېچى خىتاي تەرەپنىڭ مەيدانىنى ئەسكەرتىپ، "جۇڭگو، ئامېرىكا مۇناسىۋىتىنى ئىجابىي ۋە ئومۇميۈزلۈك ئالغا سۈرۈش ئىككى دۆلەتنىڭ تىنچلىق، بىخەتەرلىك ۋە تەرەققىيات مەنپەئەتىگە ھەسسە قوشۇدۇ" دېگەن.
ئانالىزچىلار بۇ قېتىمقى سۆھبەت بۇ يىل كىرگەندىن بېرى ئۆتكۈرلىشىپ كەتكەن ئىككى دۆلەت ئوتتۇرىسىدىكى جىددىيچىلىكنى پەسەيتىشكە قارىتىلغانلىقىنى ئىلگىرى سۈرمەكتە. بۇ يىل كىرگەندىن بۇيان ئامېرىكا - خىتاي مۇناسىۋىتى جىددىيلىشىپ، تەيۋەن مەسىلىسى، ئامېرىكا - كورىيە ھەربىي مانېۋىرى، جەنۇبىي دېڭىزنىڭ ئىگىلىك ھوقۇقى، سودا ۋە خەلق پۇلىنىڭ كۇرسى قاتارلىق مەسىلىلەردە ئىختىلاپ كۈچەيگەن ئىدى.
بېيجىڭدىكى سۆھبەت ئوباما ھۆكۈمىتى خەلق پۇلى كۇرسى ۋە سودا قاتارلىق مەسىلىلەردە ئامېرىكا دۆلەت مەجلىسىنىڭ ئېغىر بېسىمىغا دۇچ كېلىۋاتقان مەزگىلگە توغرا كەلگەن ئىدى.
ئامېرىكا ئەمەلدارلىرى دۈشەنبە كۈنى خىتاي مۇئاۋىن باش مىنىستىرى ۋاڭ چىڭشەن ۋە تاشقى ئىشلار مىنىستىرى ياڭ جيېچىلار بىلەن سۆھبەت ئۆتكۈزگەن. بىرلەشمە ئاگېنتلىقىنىڭ خەۋەر قىلىشىچە، ساممېرس ۋاڭ چىشەنگە چۈشەندۈرۈپ، پرېزىدېنت ئوبامانىڭ ئامېرىكا - خىتاي مۇناسىۋىتىنى كۈچەيتىشكە ئەھمىيەت بېرىدىغانلىقىنى بىلدۈرگەن. بېيجىڭدىكى سۆھبەت ئىككى كۈن داۋام قىلىدۇ.