B d t xitayni rohiy késelge giripdar bolghan en'giliyilik etkeschini öltürmeslikke chaqirdi

B d t ning qanunsiz ölüm jazasigha qarshi turush ishlirigha mes'ul aliy derijilik tekshürgüchi emeldari filip alston peyshenbe küni xitay da'irilirini agahlandurup, eger xitay rohiy késelge griptar bolghan bir kishining ölüm jazasini ijra qilsa "bu xitayning zor qedem bilen keynige chékin'genlikidur" dégen.

Filip alston yene, "xitayda we xelq'ara qanunda rohiy késellikke giripdar bolghan kishige ölüm jazasi bérishke bolmaydighanliqigha a'it nahayiti éniq belgilimiler barliqi"ni bildürgen.

Bu yil 53 yashlardiki akmal sheyx en'giliye puqrasi bolup, xitay hökümiti uni zeherlik chékimlik etkeschilik jinayiti sadir qilish bilen eyiblep, ölüm jazasigha höküm qilghan. U 2008 ‏- yili 4 kilogram xéro'inni chamidan'gha qachilap ürümchige élip barghanda qolgha élinip, shu yili öktebirde ölüm jazasigha höküm qilin'ghan.

En'giliye düshenbe küni xitay da'irilirining akmalgha bérilgen ölüm jazasini pat arida ijra qilmaqchi boluwatqanliqini eskertip, ölüm jazasini ijra qilishni toxtitishni telep qilghan idi.

En'giliye bash ministiri gordon brawin, akmalning rohiy késellikini nezerde tutup, xitayni uning jénini saqlap qélishqa ündigen. En'giliye tashqi ishlar ministirliqi xitay hökümiti bilen sözliship, uning jénini qutquzup qélishqa tirishidighanliqini bildürgen. Lékin xitay hökümiti akmalgha bérilgen ölüm jazasining toghra bolghanliqida ching turmaqta.