ئۆكتىچى رەھبەر ئاڭساڭ سۇكى بېرما ھۆكۈمىتىنىڭ بىر قىسىم ئىجابىي قەدەملىرىنى مەدھىيىلىدى

بېرما ھەربىي دائىرىلىرى 1962-يىلى ھەربىي ئۆزگىرىش ئارقىلىق ھاكىمىيەتنى قولغا ئالغاندىن بۇيان، 2007-يىلى ئۆكتەبىردە تۇنجى قېتىم ئومۇمىي سايلام ئېلىپ بارغان. سايلامدا ھەربىي دائىرىلەر قوللايدىغان پارتىيە ئۈستۈنلۈك قازانغاچقا، سايلامنىڭ ئادىللىقىغا گۇمان چۈشكەن ۋە يېڭى ھۆكۈمەتنىڭ دېموكراتىك ئىسلاھات ئېلىپ بېرىشىغا ئۈمىدسىز نەزەردە قارىلىپ كەلگەن ئىدى.

يېقىنقى ئايلاردىن بېرى، بېرما ھۆكۈمىتىنىڭ ئاخباراتقا قارىتا كونترولنى بوشىتىشى، بىر قىسىم ئاممىۋى تەشكىلاتلارنى تەستىقلاپ قانۇنىيلاشتۇرۇشى، بولۇپمۇ خىتاي مەبلەغ سالغان سۇ ئېلېكتر قۇرۇلۇشىنىڭ توختىتىلىشى، بېرما خەلقىنىڭ يېڭى ھۆكۈمەتكە بولغان قارىشىدا بۇرۇلۇش پەيدا قىلىشقا باشلىغان.

ئاڭساڭ سۇكى بۈگۈنكى سۆزىدە، سىياسىي مەھبۇسلار ۋە ئاز سانلىق مىللەتلەر مەسىلىسىنى بېرمىدا نۆۋەتتە جىددىي ھەل قىلىشقا تېگىشلىك مەسىلىلەر قاتارىدا تىلغا ئالغان. مەلۇم بولۇشىچە، نۆۋەتتە 2000 دىن ئارتۇق سىياسىي مەھبۇس جازا مۇددىتىنى ئۆتىمەكتە. بېرمىدىكى ئاز سانلىق مىللەتلەردىن كاچىنلار، مىللىي مۇستەقىللىق تەلىپىنى قوراللىق قارشىلىق كۆرسىتىش شەكلىدە نامايان قىلماقتا.