Apetke uchrighan tibet xelqi emdi qehritan qishning tehditige uchrimaqta

Éghir yer tewresh apitige uchrap yer bilen bir bopketken yüshu rayonidiki tibetler emdi qara qishning xirisigha duch kelmekte. Déngizdin 4000 métir igizlikte bolghan yüshuda peyshenbe künidin étibaren qattiq qar yéghishqa bashlighan bolup, xitay métrologiye idarisining bildürüshiche, qar shenbe künigiche dawam qilidiken.

Muxbirimiz irade
2010-04-22

Roytérs agéntliqining xewer qilishiche, apetke uchrighan xelq mushundaq qattiq soghuqtimu népiz chédirlarning ichide yashashqa mejbur boluwatqan bolup, qar sewebidin qatnashlar tosulup ketkenliktin kishiler ozuq - tülükkimu waqtida érishelmigen.

Radi'omiz tibet bölümining xewer qilishiche, apetke uchrighan tibet xelqi jénining derdi bilen qalghanda xitay da'iriliri muqimliqini tekitlep chégra sirtidiki düshmen küchlerning tesirini tazilashni telep qilghan.

Xitay hökümitining qutquzush eslihelirini waqtida apet rayonigha yetküzelmesliki shundaqla xelq'araliq teshkilatlar we chet'ellerning apet rayonigha yardem qilish telipige jawab bermey turuwélishi xelq'ara jem'iyetning qattiq tenqidke uchrighan. Emma xitay axbarat wastiliri "xelq'ara jem'iyet hökümitimizning apettin qutquzush xizmetlirige yüksek baha berdi" dep xewer qildi.

B b s ning xewer qilishiche, xitay xelq ishliri ministirliqining bayanatchisi péng chénming peyshenbe künidiki muxbirlarni kütüwélish yighinida apet bolghan deslepki künlerde qutquzush esliheliri bilen teminlesh, tarqitish, teqsimlesh xizmetliride qalaymiqanchiliq bolghanliqini étirap qilghan we "apetke uchrighan xelqning hayatini saqlap qélishi üchün kérek bolghan eng töwen shertlerni yaritip bérishte zor qiyinchiliqqa duch kelduq" dégen.

Tibetler kigidu dep ataydighan yüshu rayonida 14 - aprél küni meydan'gha kelgen yer tewreshte hazirghiche 2183 kishi hayatidin ayrildi, 84 kishining aqiwitidin xewer yoq.