Aqsuda hökümetke qarshi teshwiqat wereqiliri tarqaldi, aqsu weziyiti jiddiyleshti

Dunya Uyghur qurultiyi bayanatchisi dilshat rishitning bildürüshiche, xoten we qeshqerde arqimu -arqa yüz bergen weqelerdin kéyin, aqsu wilayitide xitay hökümitige qarshi teshwiqat wereqiliri tarqalghan, nöwette saqchi da'iriliri aqsuda öy axturush we tutqun qilish herikiti élip barmaqta.
Muxbirimiz shöhret hoshur
2011.08.08

Dilshat rishitning bildürüshiche, aqsu da'irilirining ramzan kirishtin ilgiri hökümet da'irilirining rayondiki Uyghurlargha qaratqan saqal qoymasliq, romal artmasliq, roza tutmasliq qatarliq cheklimiler Uyghurlarning naraziliqini kücheytiwetken.

Uyghurlar teripidin tarqitilghan teshwiqat wereqiliride, Uyghurlarning naraziliqliri ipadilen'gendin bashqa, xitaydin kelgen köchmenlerning öz yurtigha qaytip kétishi telep qilin'ghan, Uyghurlar birlik-ittipaqliqqa chaqirilghan.

Yene dilshat rishitning bildürüshiche, xitay saqchilirining 5-awghust yeni jüme küni kéchidiki tekshürüshide, awat nahiyisidiki 31 yashliq qasim xojamniyaz isimlik Uyghur, saqal qoyghini üchün saqchilar teripidin tayaq yégen hem saqili mejburiy chüshürüwétilgen.

Radi'omiz aqsu ahaliler we saqchi da'irilirige téléfon qilip ehwal igiliginide, da'iriler teshwiqat wereqiliri tarqalghanliqi heqqidiki xewerni inkar qilish bilen bille, Uyghurlargha qarita axturush élip bérilghanliqini inkar qildi؛ ahaliler bolsa ramzan kirgendin buyan aqsu weziyitining jiddiyleshkenlikini, Uyghurlargha qarita kimlik tekshürüshining yenimu kücheytilgenlikini ashkarilidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.