ئاقسۇدا يەرلىك دائىرىلەر ھۆججەت چۈشۈرۈپ، ئۇيغۇرلارنىڭ يۇقىرىغا ئەرز ‏- شىكايەت قىلىشىنى توسىماقتا

مەركىزى گېرمانىيىدىكى دۇنيا ئۇيغۇر قۇرۇلتىيى ئۇيغۇر ئەرز - شىكايەتچىلەردىن 3 كىشىنىڭ ج خ دائىرىلىرى تەرىپىدىن قولغا ئېلىنغانلىقىنى بىلدۈردى. مەزكۇر تەشكىلاتنىڭ باياناتچىسى دىلشات رىشىتنىڭ ئەسكەرتىشىچە، ئاقسۇ ۋىلايىتىنىڭ يېقىندا ھەر قايسى ناھىيىلەرگە چۈشۈرگەن 172 ‏ - نومۇرلۇق ھۆججىتىدە ئەرز - شىكايەتچىلەر جەمئىيەت مۇقىملىقىنى بۇزغۇچىلار، دەپ ئەيىبلەنگەن بولۇپ، ئۇلارنىڭ يۇقىرىغا ئەرز قىلىپ بېرىشىنى توساشتا قاتتىق ۋاستىلارنى قوللىنىش تەلەپ قىلىنغان.

يېقىنقى يىللاردىن بېرى ئاپتونوم رايون ۋە بېيجىڭغا داۋا قىلىپ بارىدىغان ئۇيغۇر ئەرز - شىكايەتچىلەرنىڭ سانى ئۈزلۈكسىز كۆپەيمەكتە ئىدى.

ئاقسۇ كەلپىن ناھىيىسىنىڭ گەزلىك يېزىسىدىكى جېلىل راھمان، يورچى يېزىسىدىكى قارى ئەھمەت، كەلپىن بازىرىدىكى ئابلىمىت يۇنۇس قاتارلىق 62 نەپەر كان ئىشچىسىنىڭ تۇرمۇش پۇلى تەلەپ قىلىش داۋاسى، يورچى يېزىسىدىكى مەمتىمىن سالى، ئىلياس روزى قاتارلىقلارنىڭ ئاقچى ناھىيىسىدىكى چارۋىچىلار بىلەن بولغان جىدەلدە زىياننى تۆلىتىۋېلىش داۋاسى، ساۋۇت سايىت، مۇھەممەت قۇربان قاتارلىق 11 كىشىنىڭ سەندۇڭلۇقلار قۇرغان ماي زاۋۇتىدىن تۇرمۇش پۇلى تەلەپ قىلىش ئەرزى، بۇ تۈردىكى داۋا - شىكايەتلەرنىڭ بىر قىسىمى ئىدى. لېكىن دائىرىلەر يۇقىرىقى كىشىلەرنىڭ ئەرزىنى كۆرۈپ چىقىشنى رەت قىلغان.