Китаб, германийидики ләмберт академик нәшрияти тәрипидин нәшр қилинған болуп, мәзкур китабқа доктор долқун қәмбириниң тәклимаканда олтурақлашқан хәлқләрниң мәдәнийити вә бу һәқтә тепилған қәдимий ядикарлиқлар, қол язмиларни тәтқиқ қилиш, рәтләш, тәһлил қилиш, изаһ бериш вә тәрҗимә қилиш асасида йезип чиққан «тәклимакан мәдәнийитиниң байқилиши», «оттура әсирдики уйғур язма ядикарлиқи маитрисимит һәққидә» вә «қисқичә уйғур әдәбият тарихи» қатарлиқ 7 парчә илмий мақалиси киргүзүлгән.
Китабни нәшр қилғучиниң сөзидә ейтилишичә, бу китаб уйғурларниң археологийилик мәдәнийити вә тарихи арқа көрүнүшни көздин кәчүрүп тәкшүрүш, уйғур тарихиға мунасивәтлик мәдәнийәт излирини чүшәндүрүштә муһим әһмийәткә игә болупла қалмай, бәлки қәдимки вә оттура әсирдики оттура асия мәдәнийити тәтқиқатидиму бошлуқни толдуруш ролини ойнайдикән.
280 Бәттин тәркиб тапқан бу китабниң қошумчә мавзуси «тәклимаканлиқлар мәдәнийитиниң қезилма мәлуматлири» болуп, др. Долқун қәмбири китабниң кириш сөзидә, уйғур мәдәнийитиниң дуня мәдәнийәт тарихида тутқан орниниң интайин муһимлиқини тәкитләп, уйғур мәдәнийәт ядикарлиқлирини қоғдап қелишниң дуня мәдәнийитини қоғдап қелиш билән баравәр икәнликини әскәрткән.
Бу китаб америка, германийә вә әнглийә қатарлиқ үч дөләттә бирла вақитта базарға селинған.
