Асия - тинч окян иқтисадий һәмкарлиқ тәшкилатиниң йиғини ечилди

22 - Ноябир күни перуниң лима шәһиридә өткүзүлгән асия - тинч окян иқтисадий һәмкарлиқ тәшкилатиға әза дөләтләр башлиқлири йиғини җәрянида дуня иқтисадий кризисини һәл қилиш мәсилилири музакирә қилиниш билән бир вақитта, америка президенти җорҗ буш үч әркинлик пикрини йәни "әркин базар, әркин сода вә әркин хәлқ" пикрини оттуриға қоюп, мәзкур үч нуқтини қоллайдиғанлиқини тәкитлиди.
Мухбиримиз үмидвар
2008.11.23

Бирләшмә агентлиқниң хәвәр қилишичә, икки күнлүк йиғин җәрянида нөвәттики пул - муамилә кризиси, сода - иқтисад һәмкарлиқлири мәсилилири музакирә қилинип, ахирида бирләшмә баянат елан қилинди. Президент буш йиғин җәрянида русийә президенти димитрий медведев билән айрим учришип, сөһбәт өткүзгән.

Б б с ниң хәвиридин қариғанда, русийә ташқи ишлар министири лаврофниң ашкарилишичә, буш билән медведев икки дөләтниң бәзи ихтилапларни дәп өзара зитлишип қалмаслиқи лазимлиқини тәкитлигән һәмдә ортақ мәнпәәтлири мәсилисидә, җүмлидин иран ядро кризиси мәсилиси, сомали деңиз қарақчилири мәсилиси вә башқиларда һәмкарлишишқа разилиқ билдүрүшкән.
 
Америка билән русийиниң мунасивәтлири йеқинқи бир йилдин артуқ вақиттин буян соғуқлишип қалған болуп, асаслиқи америкиниң шәрқий явропада башқурулидиған бомбидин мудапиә көрүш системиси орнитиш пилани русийини хатирҗәмсизләндүргән вә бу мәсилидики ихтилап икки дөләт мунасивәтлирини соғуқлаштуруп қойған иди.

Медведев өткән һәптидә вашингтонға 20 дөләт йиғиниға кәлгәндиму мәхсус русийә - америка мунасивәтлиридә тохтилип, русийә билән америка мунасивәтлириниң яхшилинишини үмид қилидиғанлиқини, ихтилапларни һәл қилиш мумкинликини тәкитлигән иди.
 
Бу қетимқи асия - тинч окян райони иқтисадий һәмкарлиқ йиғини америка президенти бушниң ахирқи бир қетим чәтәлгә чиқип хәлқаралиқ йиғинларға қатнишиши болуп қелиши мумкин икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.