Америка асия тинч окян районидики һәрбий күчини ашурушқа йетәрлик мәбләғ аҗритиду

Америка муавин мудапиә министири аштон картер чаршәнбә күни қилған сөзидә, америкиниң асия тинч окяндики һәрбий күчини ашурушқа йетәрлик мәбләғ аҗритидиғанлиқини билдүрди.
Мухбиримиз ирадә
2012.10.04

Аштон картер чаршәнбә күни хитайдин келидиған һәрбий тәһдитләр һәққидә елип берилған муһакимә йиғинида қилған сөзидә, америка мудапиә министирлиқи ‏-пәнтагонниң асия тинч окян райониға мас келидиған йеңи һәрбий қоралларға мәбләғ селишқа вә һәтта бир қисим һәрбий системиларни әвәтишкә башлиғанлиқини ейтқан.

Бу һәрбий қораллар, йеңи деңиз асти парахотлири, һәрбий тик учарлар вә ф-35 типлиқ күрәшчи айропиланларниму өз ичигә алидикән.

Мәзкур муһакимә йиғинида, хитайниң 2004-йилидин буянқи һәрбий тәрәққияти көздин кәчүрүп чиқилған болуп, мутәхәссисләр хитайниң һәрбий күчи бундин кейинму охшаш сүрәт билән тәрәққий қилған тәқдирдә, хитайниң америка билән охшаш бир саәт ичидә узун мусапилик башқурулидиған бомбисини дуняниң һәрқандақ йеригә йәткүзидиған сәвийигә улишидиғанлиқини илгири сүрүшкән.

Ройтерс агентлиқиниң хәвәр қилишичә, америка тинч окяндики хитай тәһдитигә қарши, районда һәрбий мәвҗутлуқини ашуридиғанлиқини елан қилғандин кейин, америкиниң буниңға кетидиған малийини қандақ һәл қилидиғанлиқи талаш-тартиш яратқан. Аштон картер сөзидә, америка қошунлири ирақ вә афғанистандин чекинип чиққандин кейин, америкиниң һәрбий чиқиминиң асия-тинч окян райониға йәткүдәк дәриҗидә азийидиғанлиқини ейтип, 2020-йилиғичә америка һәрбий күчиниң 60 пирсәнтини бу районға орунлаштуриду, дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.